Erulan Jamaýbaev Jusan Holdings-ke qatysty pikir bildirdi

ASTANA. QazAqparat – QR Úkimetine Jusan Holdings kompanııasynyń AQSh sotyndaǵy talap-aryzy boıynsha eshqandaı qujat kelip túsken joq. Bul týraly QR Premer-Mınıstriniń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Ázirge, bizge osy máselege qatysty qandaı da bir qujat kelip túspedi. Talap-aryz sheteldik ıýrısdıktsııada boldy. Bul turǵyda máseleniń mán-jaıy anyqtalady dep sanaımyz», - dedi E. Jamaýbaev Senatta tilshiler suraǵyna jaýap bere otyryp.

Sonymen qatar ol talap-aryzda kórsetilgen is-qımyldar QR Úkimet jaǵynan bolmaǵanyn naqtylady.

«Buqaralyq aqparat quraldaryndaǵy málimetterge qarasańyzdar, Qazaqstan Úkimeti jaǵynan eshqandaı is-qımyldar jasalmady. Sondyqtan sot bul protseske qatysty máseleni anyqtaıdy dep oılaımyn», - dedi Qarjy mınıstri.

Osy oraıda tilshiler Qazaqstannyń ustanymyn sotta qorǵaýy múmkindigine qatysty suraq qoıdy.

«Eger qajet bolsa, qorǵaımyz. Aldymen talap-aryzdy qabyldap, tıisti qujattardy joldaýy kerek. Ázirge, bizge qujattar kelip túspedi», - dedi vedomstvo basshysy.

Buǵan deıin BAQ-ta Jusan qurylymdary Qazaqstan Úkimetine qarsy shaǵym túsirgeni habarlandy.

Eske salsaq, jaqynda Bas prokýratýra Jusan tobyn Qazaqstanǵa qaıtarý jumysy júrgizilip jatqanyn habarlady.

2022 jylǵy maýsymda Prezıdent Qasym-Jomart Toqaevtyń tapsyrmasy boıynsha elden zańsyz shyǵarylǵan qarajatty Qazaqstanǵa qaıtarý jónindegi vedomstvoaralyq komıssııa qurylǵan sátten bastap Bas prokýratýra kapıtaldy jymqyrý jáne shet elge shyǵarý faktilerin anyqtaý úshin bank sektorynda taldaý júrgizdi.

Sonymen qatar Nazarbaev zııatkerlik mektepteri Jusan-dy elge qaıtarýǵa qatysty málimdeme jasady.