Erulan Jamaýbaev bıýdjet qarjysyn ıgere almaǵan mınıstrlikter men ákimdikterdi atady

Búgin Úkimet otyrysynda Premer-Mınıstrdiń orynbasary – Qarjy mınıstri Erulan Jamaýbaev bıýdjet qarajatyn eń kóp ıgere almaǵan mınıstrlikter men ákimdikterdi atady, dep habarlaıdy Kazinform agenttiginiń tilshisi.

Onyń atap ótýinshe, 9 aıda memlekettik bıýdjettiń shyǵystary - 99,3, respýblıkalyq bıýdjettiń shyǵystary – 99,6, jergilikti bıýdjetterdiń shyǵystary 99,5 paıyzǵa oryndaldy. Respýblıkalyq bıýdjet boıynsha somasy 16 trln teńgege shyǵystar júrgizildi.

«Atqarylmaý 70 mlrd teńgeni qurasa, onyń ishinde únemdeý – 16 mlrd teńge. Igerilmegeni – 54 mlrd teńge. Igerilmeýdiń neǵurlym iri somalary Ekologııa jáne tabıǵı resýrstar, Týrızm jáne sport, Іshki ister jáne Tótenshe jaǵdaılar mınıstrlikterinde qalyptasty. Igerilmeýdiń negizgi sebepteri: konkýrstyq rásimderdi uzaq merzimde ótkizý; sharttardy, qosymsha kelisimderdi jasasý rásimderin uzaq júrgizý; shot-faktýralar men atqarylǵan jumys aktilerin ýaqytyly usynbaý jáne basqalary», - dedi mınıstr.

Erulan Jamaýbaevtyń dereginshe, jergilikti bıýdjetterdiń shyǵystary 9 trln teńgeni qurady. Atqarylmaǵany - 49 mlrd teńge.

«Bıyl óńirlerge 2 trln teńgege jýyq nysanaly transfertter kózdelgen. Olarǵa 1 qazanǵa 1 trln 112 mlrd teńge bólingen. Onyń 98,5 paıyzy ıgerilgen. Atqarylmaǵany – 17 mlrd teńge, onyń ishinde 1 mlrd teńge – únemdeý, 16 mlrd teńge ıgerilmegen. Eń kóp ıgerilmeý Astana qalasy, Mańǵystaý, Atyraý jáne Qaraǵandy oblystarynda qalyptasty», - dedi mınıstr.