Ertiske shomylatyn «morj» Jylybek Qalıev aıazdy kúni sýǵa túsýdiń paıdasy jaıly aıtyp berdi
ÓSKEMEN. KAZINFORM – Qys boıy ózen-kólge shomylǵan Jylybek Qalıev kóktemde vırýstan da, túrli aýrýlardan da qoryqpaıdy. Sebebi denesi shynyqqan, ımmýnıteti kóterilgen. Ol Óskemendegi «Boran» shynyǵý jáne qysqy júzý klýbynyń múshesi. Osy rette Kazinform tilshisi Jylybek Qalıevty áńgimege tartyp, saryshunaq aıazda sýǵa túskenniń áseri men paıdasy jaıly surady.
— Alǵash ret qystyń kúni sýǵa qashan tústińiz?
— «Boran» shynyǵý jáne qysqy júzý klýbyna 2019 jyly kelip qosyldym. Osy klýb jaıly tanystarymnan estigenmin. Negizi buryndary da qysta sýǵa tússem qalaı bolady dep oılap júretinmin. Sol oıyma saı azamattar jolyǵyp, qulshyna bardym. Áýelde erejelerimen tanysyp, sýǵa túsýdi neden bastaý kerek ekendigin úırendim.
— Sonda neden bastaý kerek eken?
— Birden aıazdy kúni baryp sýǵa «kúmp» ete ketpeısiń, árıne. Sebebi deneń áli ondaıǵa daıyn emes. Aýyryp qalýyń yqtımal. Áýeli kross júgiremiz, odan keıin ár túrli jattyǵýlar jasaımyz. Klýbqa qosylarda densaýlyǵyńdy teksertip, medıtsınalyq anyqtama ótkizý qajet. Klýbtyń tájirıbeli músheleri sýǵa qalaı shomylý kerektigin úıretip kórsetedi. Alǵash túskende sýda kóp bolmaı, lezde shyǵasyń. Aǵzań úırenisken soń az-azdap qosa bastaısyń.
— Muzdaı sýǵa shomylǵanda qandaı áserde bolasyz?
— Erekshe sezim. Ol sezimdi sózben jetkizý múmkin emes. Tek seziný kerek. Sýdan shyqqanda jańaryp, jasaryp qalasyń. Meniń sýǵa shomylǵandaǵy basty maqsatym — ózimdi sergek seziný. Kún saıynǵy sharýalardan meń-zeń bolyp júrgen basyń sýǵa túsken soń aıyǵyp, jaman oılardan arylyp, tazaryp qalǵandaı bolasyń. Buǵan úırenip alǵannan keıin tula boıyń sony qalap turady. Sóıtip sýǵa túsetin sátti taǵatsyzdana tosyp júresiń.
— Klýb jaıly keńirek aıta ketseńiz. Qaı jyly qurylǵan?
— Bul klýb 1973 jyly qurylǵan. Onyń basy-qasynda Ekinshi dúnıejúzilik soǵys ardageri, sýretshi Borıs Frantsýzov tur. Nıettes, pikirles birneshe adammen birigip, qysta sýǵa shomylyp júrgen. Keıin qyzyǵýshylyq tanytqandar kóbeıip úlken klýbqa aınaldy. Qazir negizgi ǵımaraty Óskemendegi Komsomol aralynda ornalasqan. Іshinde jattyǵý jasaıtyn, kıim aýystyratyn jáne as-sý ishetin bólmeler bar. Músheleri jylyna 10 myń teńge jarna tóleımiz. Klýb aptasyna eki ret senbi, jeksenbi kúnderi saǵat 12.00-den 17.00-ge deıin jumys isteıdi.
— Qysta sýǵa túsýdiń paıdasy qandaı?
— Sýǵa túsip júrgenime 4 jyldan asty. Osy ýaqyt aralyǵynda birde-bir ret sýyq tıip, tumaýratqan joqpyn. Qysta da, kóktemde de aýrý-syrqattan ada bolyp, ózimdi jeńil sezinip júrmin. Sondyqtan paıdasy ushan-teńiz der edim.
— Klýb músheleri taǵy qandaı sport túrlerimen aınalysasyzdar?
— Ózim jeńil atletıkamen aınalysqandy jaqsy kóremin. Taýǵa baryp shańǵy tepken de unaıdy. Klýbtaǵy jigitter arasynda basseınde júzip, ústel tennısin oınap turatyndar bar.
— Alǵash shomylǵandar sýda kóp bolmaı, lezde shyǵatyndyǵyn aıtyp qaldyńyz. Al denesin shynyqtyryp, ábden ysylǵan adam sýda qansha sekýnd turady?
— Máselen, men sýda 8 sekýnd tura alamyn. Biraq negizgi maqsat sýda kóp turý emes. Eń bastysy — júıeli túrde sýǵa túsip otyrý. Klýb jumys isteıtin senbi, jeksenbini tosyp júrmeı arasynda jumys kúnderi de Ertis ózeniniń jaǵasyna baryp sheshinip, bir maltyp alatynym bar. Odan soń súrtinip, kıimimdi kıip, ary qaraı kete beremin. Bylaı qarasań eshqandaı shyǵyndy qajet etpeıtin, densaýlyqqa paıdasy orasan zor is. Kerisinshe, qarajatyńdy únemdeıdi. Aýyryp qalyp, dári izdep júrmeısiń. Kóp ýaqytty da qajet etpeıdi. Sol úshin barshańyzǵa keńes beremin.
