Ertiske káriz qaldyqtary aǵyp jatyr: sý quramynda ózgeris baıqala ma

PAVLODAR. KAZINFORM — Pavlodar qalalyq sanıtarııalyq-epıdemıologııalyq baqylaý basqarmasynyń mamandary Ertis ózenindegi sýdyń quramyn baqylaýdy jalǵastyrýda.

Qala halqy úshin aýyzsý jınalatyn «Ońtústik» sý jınaǵyshynan synamalar eki márte alynǵan.

Kýrchatovtaǵy kommýnaldyq mekemeden Ertiske tolassyz aǵyp jatqan káriz sýy ózen boıyn jaılaǵan jurtty alańdatýda. Aqsý, Pavlodar, Ekibastuz qalalary aýyzsýdy ózennen alatynyna baılanysty qazir kópshilik iship otyrǵan sýdyń tazalyǵyna kúmánmen qaraı bastaǵan.

Deıturǵanmen Pavlodar qalalyq sanıtarııalyq-epıdemıologııalyq baqylaý basqarmasynyń ókilderi ózen sýynyń quramy ózgermegenin, ony aýyzsýǵa paıdalaný qaýipsiz ekenin aıtyp otyr.

— Káriz sýy ózenge quıylyp jatyr degen aqparat túsisimen biz «Ońtústik» sý jınaǵyshynan synamalar ala bastadyq. Onyń alǵashqysy 7 jeltoqsanda alyndy. Odan soń zertteýdi 11 jeltoqsan kúni taǵy qaıtaladyq. Sý mıkrobıologııalyq, sanıtarııalyq-hımııalyq, parazıtologııalyq turǵydan zertteldi. Zertteý nátıjeleri sý quramynda ózgerister joq ekenin, barlyq normalar qalypty saqtalyp otyrǵanyna kóz jetkizdi, — dep habarlady Pavlodar qalasynyń bas memlekettik sanıtarııalyq dárigeri Aleksandr Safııanıkov Kazinform tilshisine.

Mamannyń aıtýynsha, Ertiske káriz júıesinen aǵyp shyǵatyn nájis tússe, ózen sýynyń quramynda eń áýeli ammıak pen kómirsýtek kóbeıip keter edi. Hımııalyq quramy ózgergen soń túrli mıkrobılogııalyq parazıtter de ósý ortasyn ulǵaıtady. Mundaı jaǵdaıda sýdy tutyný qaýipti.

Epıdemıologter aldaǵy ýaqytta ózen sýynyń quramyn tekserýdi jalǵastyra beretinderin aıtady.

Eske sala keteıik, Abaı oblysy Kýrchatov qalasynan aǵyp shyǵatyn qaldyq sýlar Ertis ózenine quıylyp jatqany anyqtaldy.

Keıinirek, «Kýrchatov Vodokanal» tazartylmaǵan káriz sýyn Ertiske júıeli túrde aǵyzyp kelgeni belgili boldy.