Ertis-Ýspen kanalynyń qurylysy qarjy jetispeýshiliginen sozylyp ketken

PAVLODAR. KAZINFORM — Óńirlik jer qatynastary basqarmasynyń basshysy Murat Hamıtovtyń aıtýynsha, Ertis-Ýspen kanalynyń qurylysy jobada jiberilgen qatelikterdiń jáne qarajat jetispeýshiligi saldarynan sozylyp bara jatyr.

Ertis-Ýspen kanalynyń qurylysy keńes zamanynda qolǵa alynyp, keıin toqtap qalǵan. Uzaq jyldar turyp qalýyna baılanysty onyń túbine shóp ósip, salynǵan beton plıtalaryn el-jurt taratyp alyp ketken. 2020 jyly sý qurylysy qaıtadan qolǵa alyndy. Joba boıynsha kanaldyń uzyndyǵy — 13 shaqyrym. Biraq qurylys jumystary sońǵy úsh jylda saıabyrlap qalǵan.

Oblystyq jer qatynastary basqarmasynyń basshysy Murat Hamıtov jobaǵa «QazSýShar» kásiporny jaýapty ekenin aıtady. Bıyl onyń bıýdjeti 10%-ǵa azaıtylyp, saldarynan kanal qurylysyn qarjylandyrýda qıyndyqtar týyndap otyr.

— Oblysta sýarmaly jerlerdiń artýyna baılanysty Ertis-Ýspen kanalynyń qurylysyn qaıta jańǵyrtý qajettiligi týǵany belgili. Onyń ústine joba jasalyp turǵan. Biraq jobalaýshylar kanal mańaıynda kólderdiń baryn eskermesten, kanaldyń tabanyna tek plıtalar tóseýdi ǵana usynǵan. Saldarynan kanal túbiniń topyraǵy ylǵaldanyp, plıtalar tómen qaraı syrǵanap jatyr. Sondyqtan qurylysshylar kanaldyń túbine tabıǵı tastardy tósep, nyǵaıtyp jatyr, — deıdi basqarma basshysy.

Qazirgi ýaqytta atalǵan kanaldyń alǵashqy kezegi iske qosylyp, fermerler 2,2 myń gektar jerdi ǵana sýaryp otyr. 

Jańa kanaldyń arqasynda keleshekte 10 myń gektar jerdi sýarýǵa bolady. Nátıjesinde jylyna qosymsha 500 myń tonna aýyl sharýashylyq daqyldaryn óndirý múmkindigi bar.