«Ertis» resmı túrde jeke menshik fýtbol klýbyna aınaldy

PAVLODAR. KAZINFORM — Pavlodarlyq «Ertis» fýtbol klýby resmı túrde basqarýdyń kommertsııalyq modeline kóshti. Investorlar quramyna úsh uıym engen. Atap aıtqanda, «Pavlodar ózen porty» AQ — 50%, «RR-CAPITAL» JShS — 25% jáne «Birikken jemis-kókónis kompanııasy» JShS — 25%.

«Ertis» resmı túrde jeke menshik fýtbol klýbyna aınaldy
Foto: Valerıı Býgaev

Pavlodar oblysy ákimdiginen habarlaǵandaı, kommertsııalandyrý rásimi aıaqtalyp, jańa jeke ınvestorlarmen yntymaqtastyq týraly memorandýmǵa qol qoıylǵan. 

— Bul — QR Prezıdenti Qasym-Jomart Toqaevtyń otandyq kásibı fýtbol klýbtaryn kommertsııalandyrý jónindegi tapsyrmasyn iske asyrýdaǵy mańyzdy qadam. Reformanyń basty maqsaty — jeke ınvestıtsııa tartý, basqarý tıimdiligin arttyrý jáne klýbtardyń qarjylyq turaqtylyǵyn qamtamasyz etý, — dep málimdedi ákimdikten.

«Ertis» resmı túrde jeke menshik fýtbol klýbyna aınaldy
Foto: Valerıı Býgaev

Mamandar klýbtyń kommertsııalyq basqarý modeline kóshýi onyń aldaǵy ýaqytta turaqty damýyna negiz bolýy tıis ekenin aıtady. Sebebi «Ertis» árdaıym Pavlodar óńiriniń maqtanyshy, baı tarıhy men adal jankúıerleri bar klýb boldy jáne solaı bolyp qala beretini sózsiz. Kásibı fýtbol tıimdi basqarýdy, seriktestermen júıeli jumysty, menshikti tabys kózderin jáne uzaq merzimdi ınvestıtsııalardy talap etedi. Kommertsııalandyrý jańa múmkindikterge jol ashady. 

Klýbty ınvestorlarǵa berý aldynda onyń múlkine baǵalaý júrgizilip, qajetti rásimder tolyq aıaqtalǵan. «Pavlodar ózen porty» AQ 2026 jyly klýbty qoldaý maqsatynda demeýshilik kómek retinde 250 mln teńge baǵyttady. Jyl sońyna deıin taǵy 250 mln teńge ınvestıtsııalaýdy josparlap otyr. Aldaǵy ýaqytta úsh ınvestor da «Ertisti» qarjylandyrý, ınfraqurylymdy, negizgi jáne jastar komandalaryn damytý boıynsha uzaq merzimdi mindettemeler alady. Jyl saıynǵy ınvestıtsııa kólemi keminde 1,5 mlrd teńgeni quraıdy.

— Jańa strategııanyń basym baǵyttarynyń biri — balalar men jasóspirimder fýtbolyn damytý. Іrikteý baǵytynda jumystar kúsheıtilip, talantty jas fýtbolshylardyń balalar komandasynan negizgi quramǵa ótýine qajetti jaǵdaılar jasalady. Áıelder fýtbolyn damytýǵa da erekshe kóńil bólinedi. Bul baǵyttarǵa memleket tarapynan qoldaý kórsetý jalǵasa beredi, — dep qosty óńirlik ákimdikten.

«Ertis» resmı túrde jeke menshik fýtbol klýbyna aınaldy
Foto: Valerıı Býgaev/Kazinform

2028 jyly oblysta 25 myń kórermenge arnalǵan zamanaýı fýtbol stadıonynyń qurylysy josparlanǵan. Al kelesi jyldan bastap memlekettik-jekeshelik áriptestik aıasynda 200 jas sportshy bilim ala alatyn fýtbol akademııasyn ashý kózdelip otyr.

«Ertis» fýtbol klýby úshin bul — birneshe kúrdeli jyldan keıingi damýdyń jańa kezeńi deýge bolady. 2020 jyly qarjylyq qıyndyqtarǵa baılanysty klýb jarystarǵa qatysýyn toqtatsa, 2022 jyldyń qyrkúıeginde bankrot dep tanyldy. Keıin fýtbol klýbynyń dırektory sottaldy. 

Klýbty qaıta jandandyrý jumystary 2023 jyly bastaldy.

2024 jyly «Ertis» Ekinshi lıgada óner kórsetip, kásibı fýtbolǵa qaıta oraldy. Komanda óz konferentsııasynda senimdi túrde oınap, 22 oıynnyń 18-inde jeńiske jetti. Nátıjesinde 56 upaı jınap, qarsylastar qaqpasyna 70 gol soqty. Kelesi maýsymda pavlodarlyqtar Birinshi lıgada ekinshi oryn alyp, Premer-lıgaǵa joldama jeńip aldy. Osylaısha, nebári eki jyldyń ishinde klýb qaıta jańǵyrý kezeńinen ótip, Qazaqstan fýtbolynyń joǵary dıvızıonyna qaıta oraldy.

Qazaqstan Premer-lıgasyna qaıta oralý klýbtyń 60 jyldyq mereıtoıymen tuspa-tus keldi. Óz tarıhynda «Ertis» bes ret Qazaqstan chempıony atandy: 1993, 1997, 1999, 2002 jáne 2003 jyldary. Sondaı-aq el Kýbogyn jeńip aldy.