Ertis ózeniniń jaıylmasynda qurǵaq shóp pen qamys órtendi
PAVLODAR. KAZINFORM - Aqsý qalasynyń aýyldyq aımaǵynda paıda bolǵan órtten shamamen 44 gektar aýmaq janyp ketti.

24 naýryz kúni túski ýaqytta Aqsý qalasyna qaraıtyn Q.Qamzın aýyldyq okrýgi Qarabaı aýyly mańynda dala órti tirkeldi. Ertis ózeniniń jaıylmasyndaǵy qurǵaq shópte tutanǵan tilsiz jaý keıin qamysty jerge ótken.
- Oqıǵa ornyna Pavlodar oblysy tótenshe jaǵdaılar departamentiniń kúshteri men quraldary, Q.Qamzın aýyldyq okrýgi ákimdiginiń órt sóndirý beketi, Pavlodar ormanshylyǵynyń orman kúzetiniń qyzmetkerleri, erikti órt sóndirý qurylymdary jiberildi. Órtti aýyzdyqtap, sóndirýge qamysty, batpaqty jerler ári jyldamdyǵy sekýndyna 15 metrge deıin jetken ekpindi jel kóp qıyndyq týdyrdy. Úılesimdi is-áreketterdiń kúshimen saǵat 22.57-de dala órti tolyqtaı sóndirildi. Órtengen jerdiń aýmaǵy - shamamen 44 gektar, - dep habarlady óńirlik Tótenshe jaǵdaılar departamentinen.
Órttiń taralý qaýpi joq. Tilsiz jaýdy joıýǵa 28 adam jáne 7 tehnıka jumyldyrylǵan. Órttiń sebebi anyqtalyp jatyr.
Eske sala keteıik, Astanada 60 adam órtten qutqaryldy.