Ertis ózeniniń ekojúıesin saqtaý úshin 6,3 mlrd tekshe metr sý jiberiledi
ASTANA.KAZINFORM - Sý resýrstary jáne ırrıgatsııa mınıstrligi Abaı oblysy aýmaǵyndaǵy Shúlbi sý qoımasynan Ertis ózeni basseıniniń ekojúıesin qoldaý jáne saqtaý úshin qorshaǵan ortany qorǵaý maqsatyndaǵy sý jiberý jumystaryn bastady.
Mınıstrlik málimetinshe, jalpy alǵanda sý qoımasynan 6,3 mlrd tekshe metr sý jiberý josparlanyp otyr.
Sý jiberý jumystary 4 mamyrǵa deıin jalǵasady. Negizgi kezeńi 30 sáýirge deıin ótedi. Osy ýaqyt aralyǵynda sý jiberý kólemi sekýndyna 2000-3500 tekshe metr. Eń joǵary kólem sekýndyna 3500 tekshe metr bolady. Bul kólem 10 táýlik boıy jiberiledi.
Sý jiberý bastalǵanǵa deıin Shúlbi sý qoımasynan tómen ornalasqan ózen arnasynda daıyndyq jumystary júrgizildi.
– Tabıǵat qorǵaý maqsatyndaǵy sý jiberý jyl saıyn júrgiziledi. Bul sharalar balyqtardyń ýyldyryq shashýyna qolaıly jaǵdaı jasaý, jaıylma jerlerdi sýmen qamtamasyz etý jáne Pavlodar oblysy aýyl sharýashylyǵy úshin mal azyǵyn óndirýdi qoldaý maqsatynda qajet, - dedi Ertis basseındik sý ınspektsııasynyń basshysy Medet Jádigeruly.
Buǵan deıin Sý resýrstary mınıstrligi engizgeli otyrǵan tsıfrlyq júıe nesimen tıimdi ekenin jazǵan bolatynbyz.
2030 jylǵa deıin 42 sý qoımasy salynyp, sý jınaý kólemi 2,6 mlrd tekshe metrge artady.
