Ertis ózenine sý jiberýge daıyndyq sharalary bastaldy
PAVLODAR. KAZINFORM — Ázirshe sý bosatýdyń kólemi men kestesi bekitilgen joq. Jaýapty organdar jiberiletin sýdyń aýqymy ótken jylǵydan kem bolmaıdy dep otyr.
Ertis pen Shiderti ózenderine sý bosatý sharalary jyl saıyn sáýir aıynda júrgiziledi. Bul tabıǵı teńgerimdi saqtaýǵa, mal azyǵyn molynan qamdaýǵa baǵyttalǵan ekologııalyq úderis. Ásirese Áýlıekóldegi 9 kóldiń júıesin saqtap qalýda mańyzy zor.
— Bizdiń mamandar elimizdiń shyǵysyndaǵy taý ózenderi men sý qoımalary mańyndaǵy ylǵalǵa apta saıyn monıtorıng júrgizip, jaǵdaıdy baqylaýda ustap otyr. Negizi Ertis ózeniniń tasýyna búıirlik aǵystar áser etetini málim. Shyǵys Qazaqstan men Abaı oblystaryndaǵy ylǵal qory mol ekeni baıqalady. Buqtyrma sý qoımasy mańaıyndaǵy ylǵal qory jyldaǵydan kóbirek. Ertistiń oń búıirinde asa iri sý qoımasy — Buqtyrma, Úlbi men Oba, Kúrshim jáne basqa da ózender ornalasqan. Kóktemde negizgi sý kólemi osy oń búıirden qosylady. Sol jaq búıirinde Kókpekti, Qyzylsaı sııaqty shaǵyn ózender toby bar, bul aýmaqtan asa kóp kólemde sý kelmeıdi. Taǵy bir atap óterligi, Tarbaǵataı taýlaryndaǵy ylǵal qory da jyldaǵydan mol. Osynyń bári túptep kelgende bıyl Ertiske jiberiletin sý kóleminiń byltyrǵydan kóp bolatynyn baıqatyp otyr, — deıdi Sý resýrstary komıtetiniń sý resýrstaryn paıdalaný jáne qorǵaý jónindegi «Ertis» basseındik ınspektsııasy basshysynyń orynbasary Eleýsiz Qambarov.
Byltyr Ertiske 6,7 sharshy shaqyrym sý jiberilip, nátıjesinde ózen jaıylmalarynyń 80 paıyzdan astamy tirshilik nárine qanyqqan.
Óńirlik jer qoınaýyn paıdalaný, qorshaǵan orta jáne sý resýrstary basqarmasynyń jaýapty mamandary sý qoımalarynan Ertis ózenine sýdyń qashan bosatylatynyn boljap aıtý ázirshe múmkin emes ekenin aıtady. Onyń merzimi sáýir aıynyń basynda belgili bolyp qalýy kerek. Salaaralyq sý bosatý komıssııasy bıyl qansha kólemde sý bosatylatyny týraly sheshim qabyldaıdy.
Eske sala keteıik, Pavlodarda qys ortasynda Ertis ózeniniń deńgeıi kóterilip, sharýalar shópterin tası almaı jatqany týraly jazǵan edik.
Keıin Ertis ózeniniń arnasynan asý sebebin basseındik ınspektsııa túsindirdi.