Ertis ózenine sý bosatý: Pavlodar oblysynyń ákimdigi túsinik berdi

PAVLODAR. KAZINFORM - Óńirlik ákimdiktiń málimetinshe, bıyl Ertis ózeniniń jaıylmasyna 7 mlrd tekshe metrden kem sý jiberilmeıdi.

Ертіс өзеніне су босату шаралары аяқталып қалды
Фото: Наталья Зинченко / Kazinform

Pavlodar oblysy ákiminiń orynbasary Áıgerim Qabyltaeva Shyǵys Qazaqstandaǵy sý qoımalarynan sý bosatýdyń kólemi men merzimderine qatysty ózgerister bar ekenin habarlady.

- Ertis ózenine sý bosatý, sáıkesinshe ózenniń oıly jerlerindegi jaıylmalardy tirshilik nárine qanyqtyrý jospary byltyrǵydan kóp bolmasa, kem bolmaıdy. Byltyr josparly 6,2 mlrd tekshe metr sýdyń ornyna naqty túrde 6,7 mlrd tekshe metr sý bosatylǵany málim. Al bıyl aldyn ala boljam boıynsha jiberiletin sýdyń kólemi 7 mlrd tekshe metrden kem bolmaıtynyn aıtqym keledi. Sebebi Ertis ózeni jaıylmasyndaǵy ekologııalyq teńgerimdi ustap turý úshin kóktemgi sý bosatý sharasynyń mańyzy asa zor. Bul boıynsha QR Sý resýrstary jáne ırrıgatsııa vıtse-mınıstrimen sóılesildi. Vedomstvoaralyq komıssııanyń otyrysy 4-5 sáýir kúnderi ótip, 8-9 sáýir kúnderi sý bosatý sharalaryn bastap ketemiz degen jospar tur, - deıdi Áıgerim Qabyltaeva.

Qazgıdromettiń aldyn ala boljamy boıynsha, Shyǵys Qazaqstan jáne Abaı oblystarynyń aýmaǵynda sáýir aıy jyly jáne jaýyn-shashyndy bolady dep kútilýde.

Osyǵan baılanysty basseındik ınspektsııamen birlesip jiberiletin sýdyń kólemi pysyqtalyp, kestesi ázirlengen. Oǵan sáıkes jiberiletin 7 tekshe kılometr sý sekýndyna 3500 tekshe metr jyldamdyqpen aǵýy kerek. 8 sáýirde daıyndyq kezeńi bastalsa, negizgi kezeńi 13 sáýirden 2 mamyrǵa deıin 20 táýlikke josparlanǵan. Jiberiletin sýdyń bul kólemi jaıylma alqabynyń shamamen 85% basady dep boljanýda.

Mamandardyń aıtýynsha, bosatylatyn aǵynnyń jyldamdyǵy joǵary bolsa, 6-7 mlrd tekshe metr sý jaıylmanyń 90 paıyzdan astamyna sý shyǵarýǵa múmkindik beredi. Byltyr sýdyń aǵynyna birqatar faktorlar teris áser etken. Máselen, Semeıdegi kópir qurylysyna baılanysty Ertiske aǵyzylyp jatqan sýdyń qarqyny báseńdep qaldy.

Buǵan deıin Shúlbi sý qoımasy 80%-ǵa ǵana tolýyna baılanysty Ertis ózenine jiberiletin sýdyń kólemi azaıýy múmkin ekenin jazǵanbyz.

Сейчас читают