Keıingi 11 jylda alǵash ret Ertis jaıylmasynyń 90 paıyzyn sý basady

PAVLODAR. KAZINFORM - Shyǵys Qazaqstandaǵy sý qoımalarynan Ertis ózenine shamamen 6,5 mlrd tekshe metrden astam sý jiberiledi dep josparlanǵan. Bul kólem ózen jaıylmalarynyń 90%-yn tirshilik nárimen qamtamasyz etýge jetkilikti.

Bul týraly Pavlodar oblysynyń ákimi Asaıyn Baıhanov Telegram-daǵy paraqshasynda jarııalady.

«Aımaq Buqtyrma men Shúlbi sý qoımalarynan josparly túrde tabıǵatty qorǵaý maqsatynda jiberiletin sýdy qabyldaýǵa daıyndalyp jatyr. Bıyl sońǵy 11 jylda eń úlken kólemde sý keledi dep josparlanǵan, 6,5 mlrd tekshe metrden astam. Jaıylmanyń 90%-yn derlik sý basady. Jergilikti atqarýshy organdar tótenshe jaǵdaılar departamentimen birlesip barlyq bógetti tekserýde. Bógetterdi jańartý jáne jaǵalaýdy nyǵaıtý jumystary Pavlodar qalasynyń Kenjekól aýyly men Atameken kentinde, Aqsý qalasynyń MAES shaǵyn aýdanynda, sondaı-aq, Maı, Aqtoǵaı, Tereńkól jáne Aqqýly aýdandarynyń jaǵalaý boıynda ornalasqan aýyldarynda bastaldy. Sýdyń turǵyndarǵa zııanyn tıgizbeı jáne óńirdiń ekojúıesi men agrarlyq sektory úshin barynsha paıdaly bolýyn qamtamasyz etý – barlyq deńgeıdegi ákimderdiń basty mindeti», - dep málimdedi óńir basshysy.

Sý bosatý sharalary sáýir aıynyń ortasynda bastalýy múmkin.

Sondaı-aq ákim qazir óńirdegi sý tasqyny jaǵdaıy turaqtalǵanyn, oblysta ár túrli dárejede 38 turǵyn úı zardap shekkenin habarlady. Sonyń ishinde 24 úıdiń ıesine keltirilgen zalaldyń ótemaqysy tolyq tólendi. Qalǵan 14 úıdiń ıesi tólemdi osy aptanyń sońyna deıin alady.

Eske sala keteıik, bıyl Ertiske sý bosatatyn ózen basseınderinde ylǵal jetkilikti.

Buǵan deıin Pavlodardaǵy Aqkól — Jaıylma alqabyna sý bosatý sharasy bastaldy.

Mamandar Ertis ózenindegi sý deńgeıi qazirgi ýaqytta qalypty saqtalyp turǵanyn habarlady.