Ertis ózenindegi muz ótkelderi qaýipti bolýy múmkin – tótenshe jaǵdaı eskertedi
PAVLODAR. KAZINFORM - Pavlodar oblysynda ashylǵan 5 muz ótkeli qutqarý quraldarymen tıisinshe jaraqtalmaǵan. Prokýratýra ruqsat berse, tótenshe jaǵdaı qyzmeti aldaǵy ýaqytta tekseris bastaýy múmkin.
Pavlodar oblysynda 5 muz ótkeli ashyldy. Olardyń barlyǵy Ertis ózeni ústinde ornalasqan. Ótkelder Maı, Aqqýly, Tereńkól aýdandarynda paıdalanýǵa berilip, muz ústinde jaıaý júrginshilermen qosa, avtokólikter de qozǵala bastady. Mamandar qozǵalys erejeleri men qaýipsizdik sharalaryna saq bolýdy eskertedi. Sebebi, jergilikti atqarýshy organdar olardy arnaıy qalqandarmen, qutqarý quraldarymen jaraqtamaǵan.
- Ótkelderdegi muzdyń qalyńdyǵy 40-tan 70 santımetrge deıin jetedi. Іshki ister mınıstrliginiń 2015 jylǵy 19 qańtardaǵy № 34 buıryǵyna sáıkes, muzdyń qalyńdyǵy 25 santımetrden assa, avtokólikterdiń ótýine, 10 santımetrden assa, jaıaý adamnyń júrýine ruqsat beriledi. Biraq buıryqta ótkelderden túsetin jerlerde eki jaqtan da ornatylǵan qalqandarda arnaıy qysqy qural-jabdyqtar (ilgekter, satylar, qutqarý sheńberleri, bóreneler) qoıylýy kerektigi eskertilgen. Buǵan qosa kireberisterde ótkeldiń ataýy, jumys ýaqyty jáne ony qurý men ustaýǵa jaýaptylardyń derekteri kórsetilgen mańdaıshalar ornatylady. Ári ol jerdegi muzdyń qalyńdyǵy kúnine 2 ret ólshenýi tıis. Bizdiń mamandarymyz ashylǵan ótkelderdi sholyp shyǵyp, tıisti jaǵdaılar jasalmaǵanyna kóz jetkizdi. Atqarýshy organdarǵa eskertý jasap, prokýratýraǵa hat joldadyq. Zań boıynsha biz shaǵym túspeıinshe nemese tapsyrma berilmeıinshe óz betimizben tekseris júrgize almaıyz. Eger quzyrly organ ruqsat etse, tekseristi bastaımyz ári tıisti sharalar qabyldaımyz, - deıdi óńirlik tótenshe jaǵdaılar departamenti azamattyq qorǵanys basqarmasy bastyǵynyń mindetin atqarýshy, podpolkovnık Erlan Qasymov.
Aımaqtaǵy muz joldary negizinen mal azyǵy men otyn tasý úshin paıdalanylady. Qazir Maı aýdanynda - Baskólde, Aqqýlydaǵy ıAmyshevta, Tereńkólde – Tereńkól, Beregovoı, Peschan aýyldarynda ótkelder jumys istep tur. Aldaǵy ýaqytta Tereńkólde taǵy bireýi ashylady dep josparlanǵan.
Erlan Qasymov aımaqtaǵy muz ótkelderiniń sany ótken jylmen salystyrǵanda edáýir az ekenin aıtyp ótti. Byltyr 13 muz ótkeli bolǵan.
- Arqa dalasynda bıyl jyldaǵydaı aıaz joq, soǵan saı Ertis ózeniniń ortańǵy tustarynda muz qatpaǵan jaǵdaılar jıi kezdesip otyr. Ári ózenge Aqsýdaǵy jylý-elektr stansasynan shyǵatyn jyly aǵys quıady. Ol da muzdyń jetkilikti qatpaýyna áser etedi. Ótkelderde muz normaǵa saı kelmese, talapqa saı jaraqtalmasa adamdar men avtokólikterdi ótkizýge bolmaıdy. Ondaı muz joldarynda qaýip kez kelgen sátte týyndaýy yqtımal. Al adam ómirinen artyq qundylyq joq,-deıdi maman.
Tótenshe jaǵdaı qyzmetkerleri muz ústine kólikpen shyqqanda baıaý júrý kerektigin jáne tejegishti birden baspaý kerektigin eskertedi. Muzda toqtaýǵa, burylýǵa, ózge avtokólikti basyp ozýǵa bolmaıdy. Muz ústinen ótpes buryn jolaýshylardy túsirip, qaýipsizdik beldigin sheship tastaý kerek. Al júrgizýshi jaqtaǵy esikti ashyq qaldyrǵan durys. Ruqsat etilmegen jerlerde balyq aýlaýǵa, shuńqyrlar jasaýǵa, muz ústine shyǵýǵa bolmaıdy.
Eske sala keteıik, Ertis ózeninde juqa muzǵa shyǵyp, sýretke túspek bolǵan qyz oıyqqa qulap ketti.