Ertis ózenindegi maıly daq: jyly aǵystan munaı ónimderi anyqtalǵan joq
PAVLODAR. KAZINFORM — Pavlodar oblysy boıynsha ekologııa departamentiniń mamandary Ertiske quıatyn «Teplaıa techenıe» saǵasynan alynǵan synamany zerthanalyq synaqtan ótkizip, ózen sýy taza degen qorytyndy shyǵardy.
— Arnaıy zerthana mamandary 16 naýryz kúni jyly aǵysqa baryp, odan synama alǵan bolatyn. Sý quramyn zertteı kele onyń quramynan munaı ónimderine qatysty lastaýshy zattar anyqtalmady. Al ózen saǵasyn óndiris úshin paıdalanyp otyrǵan «EEK» AQ Aqsý GRES stantsııasynyń basshylyǵy kásiporynda sońǵy kúnderi eshqandaı apattyq jaǵdaı tirkelmegenin aıtyp otyr, — dep habarlady Kazinform tilshisine óńirlik ekologııa departamenti basshysynyń orynbasary Áset Syzdyqov.
Departament ókili sondaı-aq ózen sýynyń lastanýy týraly jeke turǵynnan shaǵym kelip túskenin jetkizdi. Ekologtar soǵan oraı Aqsý GRES stantsııasyna tekserý júrgizýdi uıǵaryp otyr. Tekserý quqyq qorǵaý organdarynda tirkelgen soń birden iske kirisedi.
— Negizi «Teplaıa techenıe» saǵasyn «EEK» AQ ǵana paıdalanyp otyrǵanyn bilýimiz kerek. Ertis ózeninen bólinip aǵatyn sý arnasy elektr stansasyna salqyn kúıinde enip, odan qyzǵan kúıinde shyǵady. Sý aǵysyn lastaıtyn ózge kásiporyndar mańaıda joq. Sondyqtan joǵaryda bolǵan jaǵdaı biz úshin beımálim bolyp otyr. Kásiporyn shyn máninde sýdy lastap kelgen bolsa, zerthanalyq zertteýler ony anyqtar edi. Ertis ózeniniń sýy taza, turǵyndardyń alańdaýyna negiz joq, — dep qosty Áset Syzdyqov.
Buǵan deıin Ertis ózeniniń jyly aǵysy munaı ónimderimen lastanýy múmkin ekeni týraly jazǵanbyz.
Al oblys ortalyǵyn aýyzsýmen qamtamasyz etip turǵan kásiporynnyń zerthanasy jedel túrde aýyzsýdan synama alyp, normatıvtik kórsetkishterden aýytqýlar tabylmaǵanyn málim etken.
