Ertis ózenindegi maıly daq: aýyzsýǵa qaýip tónip tur ma

PAVLODAR. KAZINFORM — Oblys ortalyǵyn aýyzsýmen qamtamasyz etip turǵan kásiporynnyń zerthanasy jedel túrde aýyzsýdan synama alǵanyn habarlady. Normatıvtik kórsetkishterden aýytqýlar tabylmaǵan.

Ertis ózenine lastanǵan sýdyń quıylyp jatqany týraly beınejazbadan soń Pavlodar qalasynyń turǵyndary iship otyrǵan aýyzsýdyń sapasyna alańdaı bastaǵan bolatyn. Qala halqy tolyǵymen ózen sýyn tutynady.

— Bizdiń mekemeniń zerthana mamandary Ertis ózeninen sý synamalaryn alyp tekserdi. Zertteý nátıjeleri boıynsha sýdyń sapasy qoldanystaǵy sanıtarlyq normalar men Sanıtarlyq qaǵıdalar talaptaryna tolyq sáıkes keletini anyqtaldy. Normatıvtik kórsetkishterden aýytqýlar tabylǵan joq. Turǵyndardyń alańdaýyna esh negiz joq, — dep habarlady «Pavlodar-Vodokanal» mekemesinen.

Buǵan deıin Ertis ózeniniń jyly aǵysy munaı ónimderimen lastanýy múmkin ekeni týraly jazǵanbyz. Qazir ekologtar ózen sýynan synama alyp, zerttep jatyr. Onyń nátıjeleri aldaǵy kúnderi belgili bolady.