Ertis ózeninde joǵalyp ketken Reseı azamatynyń múrdesi tabyldy
PAVLODAR. KAZINFORM — Qutqarýshylar 1990 jylǵy er azamattyń denesin Ertis ózeninen alyp shyqqan. Marqum 28 mamyr kúni sýǵa túsip júrip joǵalyp ketken edi.
Pavlodar oblystyq tótenshe jaǵdaı departamenti qutqarýshylar ózennen eki adamnyń múrdesin alyp shyqqanyn habarlady.
— 1 maýsym kúni Ertis aýylynyń mańynda, Ertis ózeniniń bir salasynyń jaǵalaýynan qutqarýshylar 1990 jyly týǵan áıeldiń máıitin sýdan alyp shyqty. Áıel 18 mamyr kúni belgisiz jaǵdaılarda sýǵa batyp ketken bolatyn. Sondaı-aq osy kúni Ertis ózeniniń Pavlodar qalasy aýmaǵynda jedel-qutqarý jasaǵynyń qutqarýshylary Reseı Federatsııasynyń 1990 jyly týǵan azamatynyń denesin sýdan alyp shyqty, — dep málimdedi departamentten.
Іzdestirý jumystary tótenshe jaǵdaı qyzmetkerleri men polıtseılerdiń birlesýimen júrgizilgen. Óńirlik tótenshe jaǵdaı departamentiniń mamandary shomylý maýsymy bastalǵaly birneshe adamnyń sýǵa ketkenin jetkizdi. Olardyń ólimine sýǵa týsýge tyıym salynǵan jerlerde shomylý, óz múmkindikterin asyra baǵalaý jáne spırttik ishimdik ishken kúıde sýǵa túsý sebep bolǵan.
— Qutqarýshylar óńir turǵyndary men qonaqtaryn sýdaǵy qaýipsizdik erejelerin saqtaýǵa, alkogol ishimdik ishken kúıde sýǵa túspeýge, jabdyqtalmaǵan jerlerde shomylmaýǵa jáne balalardy sý aıdyndarynyń janynda qaraýsyz qaldyrmaýǵa shaqyrady. Qarapaıym saqtyq sharalary adam ómirin saqtap, qaıǵyly jaǵdaılardyń aldyn alýǵa kómektesedi, — dep qosty departamentten.
Buǵan deıin Reseıden Pavlodarǵa qonaqqa kelgen er adam Ertis ózeninde joǵalyp ketkenin jazǵanbyz.
