Ertis ózeninde sýǵa ketken er adamnyń múrdesi alty táýlikten soń tabyldy
PAVLODAR. KAZINFORM — Ertis ózeninde joǵalyp ketken er adamdy izdeý jumystary aıaqtaldy. Marqumnyń múrdesi oqıǵa ornynan shamamen 4 shaqyrym jerden tabylǵan.
Іzdeý-qutqarý jumystaryna qutqarýshylar men Pavlodar oblysy tótenshe jaǵdaılar departamentiniń qyzmetkerleri, joǵalǵan adamnyń týystary jáne eriktiler qatysqan. Operatsııany basqarý jáne úılestirý úshin jedel shtab quryldy.
— Іzdeý jumystary boljamdy sýǵa ketken jerden bastap Ertis ózeniniń aǵysymen tómen qaraı júrgizildi. Súńgýirler sýǵa 28 ret súńgip, eholottyń kómegimen ózen túbiniń 38 500 sharshy metr aýmaǵyn zerttedi. Qutqarýshylar ózenniń oń jáne sol jaǵalaýlaryn boılaı, aǵys baǵytymen tómen jáne joǵary qaraı jalpy 272 shaqyrym aýmaqty tekserdi. Sonymen qatar alty ýchaskedegi úıindi butaqtar men aǵashtar qaraldy. Jaıaý izdeý barysynda oń jaǵalaýdyń 93 shaqyrym aýmaǵy zertteldi, — dep málimdedi óńirlik tótenshe jaǵdaılar departamentinen.
Mamandar turǵyndardy sýdaǵy qaýipsizdik erejelerin saqtaýǵa shaqyryp otyr. Sý ústine shyqqan kezde qutqarý keýdeshesin paıdalanýdy jáne aýa raıy qolaısyz bolǵan jaǵdaıda sý aıdyndaryna barmaýdy eskertedi.
Eske salaıyq, bıylǵy 12 qyrkúıekte Janaýyl aýyly mańynda bes adam otyrǵan metall qaıyq aýdarylyp ketken. Tórt adam ózdiginen jaǵaǵa shyqqan. Al 1983 jyly týǵan er adam sýǵa ketken dep boljanǵan edi.
