Ertis ózeninde sýǵa batyp ketken er adamnyń denesi bir aıdan soń tabyldy

PAVLODAR. KAZINFORM — Marqumnyń denesi oqıǵa bolǵan jerden 150 kılometr qashyqtyqta tabylǵan. Ony Jelezın aýyly mańynda jergilikti turǵyndar baıqap qalǵan. 

12 sáýir kúni túnde Ertis ózeninde jaǵaǵa baılanǵan barjadan sýǵa sekirip, keıin sý betine shyqpaǵan er adamnyń denesi arada bir aı ótkende tabyldy.

— 13 mamyr kúni saǵat 14.00-de Jelezın aýylynan 8 km qashyqtyqta Ertis ózeniniń jaıylmasynan er adamnyń denesi tabyldy. Ony jergilikti turǵyndar baıqaǵan. Marqumnyń denesin qutqarýshylar sýdan alyp shyǵyp, týystaryna kórsetken. Týystary 12 sáýirde Tereńkól aýdanynyń Beregovoı aýyly mańynda sýǵa batyp ketken er adamnyń denesi ekenin rastady, - dep habarlady óńirlik tótenshe jaǵdaılar departamentiniń baspasóz qyzmetinen.

Belgili bolǵandaı, marqumnyń denesin qatty aǵys oqıǵa bolǵan jerden shamamen 140-150 kılometrge alyp ketken. Buǵan deıin izdestirý jumystary barysynda qutqarýshylar eholottardy paıdalana otyryp, Ertis ózeniniń túbine tekserý júrgizip, jaǵalaýlar tekserilgen bolatyn. 50-den astam súńgýirlik jumys júrgizilip, olardyń barysynda shamamen 700 sharshy metr zerttelgen. Mamandardyń aıtýynsha, izdeý jumystaryna sýdyń qatty aǵyny men laıly bolýy, sýdyń jaıylýy kedergi keltirgen.

Eske sala keteıik, Ertis ózeninde er adam barjadan sekirip, sýǵa batyp ketti. 

Keıin sý deńgeıiniń kóterilýine baılanysty Ertiske batqan adamdy izdeý ýaqytsha toqtatyldy. 

Al mamyrdyń alǵashqy onkúndiginde Ertis ózenine batyp ketken er adamdy izdeý jumystary qaıta jandandy.