Ertis ózeninde muz qatsa, jaıylmaǵa sý shyǵyp ketýi múmkin be

PAVLODAR. KAZINFORM — Pavlodar óńirinde qarasha aıy ádettegiden jyly bolyp tur. Soǵan oraı Ertis ózeninde áli kúnge muz qabaty túzilgen joq. 

Byltyr jeltoqsan aıynyń basynda Ertis ózeniniń Pavlodar oblysyndaǵy arnasy tasyp, jaǵasyndaǵy el-jurtty ábigerge salǵany málim. 

Saldarynan aýyl turǵyndary jazda shaýyp qoıǵan shópterin tası almaı qalǵan bolatyn. Keleńsiz jaǵdaı bıyl taǵy qaıtalanýy múmkin be?

Sý resýrstary komıtetiniń sý resýrstaryn paıdalaný jáne qorǵaý jónindegi «Ertis» basseındik ınspektsııasy basshysynyń orynbasary Eleýsiz Qambarov qazirgi ýaqytta ondaı qaýip joq ekenin habarlady.

— Ótken jyly Shyǵys Qazaqstandaǵy Úlbi sý qoımasynan mol sýdyń jiberilgeni májbúrli qadam boldy. Jaýyn-shashyn men qalyń jaýǵan qar saldarynan qoımada sý kóbeıip ketken edi. Onyń ústine Ertiske muz erte qatty. Qazirgi ýaqytta sý qoımalaryndaǵy sýdyń kólemi normaǵa saı, táýliktik sý jiberý kólemin ulǵaıtý týraly másele kóterilmegen. Aldaǵy kúnderi ózende muz qatqannyń ózinde ondaı qaýip baıqalmaıdy, — dep málimdedi ol.

Óńirlik tótenshe jaǵdaılar departamentiniń habarlaýynsha, qazirgi ýaqytta Ertis ózeninde muz jabyndysy joq. Sý beti tolyqtaı ashyq, muz túzilý protsesi áli bastalmaǵan.

— Gıdrometeorologııalyq baqylaýlarǵa súıensek, Ertis ózeninde boljamdy muz ornaý kezeńi 2025 jylǵy 29 qarasha — 7 jeltoqsan aralyǵynda kútilip otyr. Muzdyń turaqty qalyptasýy shamamen 13 jeltoqsanda bolýy kerek. Byltyr ózenniń muzy 15 qarashadan qata bastap, 25 qarashada tolyqtaı qalyptasqan. Sondyqtan turǵyndarǵa qaýipsizdik sharalaryn eske salamyz. Alǵashqy aıaz túskende keıbir jerlerde juqa muz qabattary paıda bolýy múmkin. Biraq ol adam salmaǵyn kótere almaıdy, — deıdi oblystyq tótenshe jaǵdaılar departamenti bastyǵynyń orynbasary Qaırat Shaımardenov.

Eske sala keteıik, Ertis basseıni aýmaǵynda zańsyz salynǵan 13 nysan joıylady.