Ertis ózeninde kemeler qashan qatynaı bastaıdy
PAVLODAR. KAZINFORM — Navıgatsııalyq kezeńniń alǵashqy kúni kemeler tek ózenniń joǵarǵy jaǵynda — Maıtúbek — Pavlodar qalasy baǵytynda ǵana qatynaı alady. Odan soń Pavlodar — Tómengi Alekseevskıı (RF shekarasy) baǵyty ashylady dep josparlanyp otyr.
QR Kólik mınıstrliginiń Avtomobıl kóligi jáne kóliktik baqylaý komıteti Pavlodar oblysy boıynsha kóliktik baqylaý ınspektsııasynan habarlaǵandaı, kelesi aptada Ertis ózeninde navıgatsııalyq kezeń bastalady. Qarasha aıyna deıin pavlodarlyq kásipkerler sý ústi jolymen Abaı, Shyǵys Qazaqstan oblystaryna jáne Reseı Federatsııasyna óz júkterin tolassyz jetkizip, alys-beris eselene túsedi.
Pavlodar oblysy boıynsha kóliktik baqylaý ınspektsııasynyń jetekshi mamany Rýslan Dúısekeevtiń málimetinshe, navıgatsııalyq kezeń eń áýeli 23 sáýir kúni Ertis ózeniniń joǵary jaǵynda ashylady.
— Maıtúbek — Pavlodar qalasy baǵytynda kemelerdiń sýda júzýine ruqsat beriledi. Al 24 sáýirden Pavlodar — Tómengi Alekseevskıı qaırańy (RF shekarasy) baǵytynda sý kólikteri tolassyz júre alady. Qazirgi ýaqytta bizdiń ınspektsııanyń arnaıy esebinde Pavlodar oblysy boıynsha úlken kólemdi 106 sý kóligi tirkelgen. Olardyń ishinde eki keme jolaýshylar tasymalyna arnalǵan. Pavlodar ózen vokzaly bul quraldardy ózen ústindegi jolaýshylar serýenin uıymdastyrý úshin paıdalanyp keledi. Ózgesi — júk tasýǵa, sý joldaryna arnalǵan sý kólikteri. Qazirgi ýaqytta ishki sý joldarynyń jaǵdaıy «Qazaqstan sý joldary» uıymynyń jergilikti fılıalynyń mamandary arqyly tekserilip jatyr, — deıdi ınspektsııa ókili.
Mamannyń sózinshe, ishki sý joldary arqyly júk jáne jolaýshylar tasymaldaıtyn ózen kólikteriniń qyzmetkerleri ýaqyt saıyn biliktiligi men deńgeıin arttyryp otyrýy kerek. Mysaly, keme kapıtany bes jylda bir márte attestattaýdan ótedi.
— Ózen qaıyqtary da arnaıy esepke alynady. Jalpy oblystaǵy sý kólikteriniń sany 1713 bolsa, sonyń 1607-si — shaǵyn kólemdi kemeler. Esepke salmaǵy 200 keliden, qozǵaltqyshynyń qýattylyǵy 10 attyń kúshinen asatyn shaǵyn kólemdi qaıyq quraldary ǵana enedi. Al esepke tirkelgen sýda júzý quraldaryn basqarýshyda arnaıy júrgizýshi kýáligi, keme bıleti bolýy mindetti. Arnaıy esepke jatpaıtyn shaǵyn qaıyqtar esh tirkeýsiz júre berýine bolady, — dep túsindirdi maman.
Pavlodar oblysy aýmaǵyndaǵy keme qatynasy sý joldarynyń jalpy uzyndyǵy — 603 shaqyrym. Bul aýmaqta 3 kópir, 2 ótkel, 4 aılaq, 1 sý qoınaýy (zaton), 1 reıdtik jáne shaǵyn kólemdi kemeler turatyn 3 baza jabdyqtalǵan.
Buǵan deıin Ertis ózenindegi sý kólikteri tehnıkalyq baıqaýdan qalaı ótetini týraly jazǵanbyz.