Ertis ózeninde qanaty jaralanǵan aqqý jyly jaqqa usha almaı qalǵan

PAVLODAR. KAZINFORM — Pavlodarlyq ormanshylar qanaty synyp, usha almaı qalǵan aqqýdy jaǵaǵa shyǵardy. Ol jaraqatyna baılanysty jyly jaqqa usha almaı qalǵan.

Ertis ózeninde qanaty jaralanǵan aqqý jyly jaqqa usha almaı qalǵan
Foto: Ajdar Júsipov

Pavlodar orman jáne janýarlar dúnıesin qorǵaý mekemesiniń basshysy Ajdar Júsipovtiń aıtýynsha, aqqýdy jergilikti turǵyndar baıqap, orman qorǵaý qyzmetine habarlasqan. Jaraly qus Ertistiń joǵarǵy aǵysyndaǵy Ońtústik sý qoımasynda, muz ústinde jatqan jerinen ustalǵan.

— Ertis ózeninde qazirgi ýaqytta muz qata bastady. Aqqýdyń sol jaq qanaty zaqymdanyp, syńaryna erip usha almaı qalyp qoıǵan tárizdi. Bul aqqýlar ishindegi sybyrlaq aqqý túrine jatady. Denesi iri, appaq qaýyrsyndy, uzyn ári ıilgen moınymen erekshelenetin ásem sý qustarynyń biri. Ol kóbine kólderde, ózenderde jáne ósimdikteri mol sý aıdyndarynda mekendeıdi, — deıdi Ajdar Júsipov.

Qazirgi ýaqytta jabaıy qusty veterınar mamandar qarap jatyr. Jaraqaty aýyr bolǵan jaǵdaıda ol Pavlodar aýylyndaǵy jabaıy janýarlar men qustardy ustaıtyn arnaıy orynǵa ornalastyryp, sonda qystap shyǵady.

Buǵan deıin Petropavlda qutqarýshylar muz qursaýynda qalǵan aqqýdy aman alyp qalǵanyn jazǵanbyz.

Al byltyr qaqaǵan qysta Pavlodarda aýyl turǵyny aıazda qalyp qoıǵan qos aqqýdy qutqaryp qalǵan edi. 

Bıyl kóktemde atalǵan aqqýlar aıdynyna qaıta jiberildi.

Foto, vıdeo: Ajdar Júsipov