Ertis ózeninde er adam barjadan sekirip, sýǵa batyp ketti

PAVLODAR. KAZINFORM — Tótenshe jaǵdaılar qyzmetkerleri marqumnyń múrdesin izdeý sharalaryn jalǵastyryp jatyr. 

Ertis ózeniniń Pavlodar oblysy Tereńkól aýdany aýmaǵynda er adam sýǵa batyp ketti. Ol óz seriktesterimen sý jaǵasynda balyq aýlap, ishimdik ishken.

— Kýágerlerdiń habarlaýynsha, 12 sáýir kúni túnde demalýshylardyń biri jaǵaǵa baılanǵan barjadan sýǵa sekirip, keıin sý betine shyqpaǵan. Aldyn ala málimetter boıynsha, bir top azamattar álgi jerde balyq aýlap, ishimdik ishken. Oqıǵa ornyna tótenshe jaǵdaılar departamentiniń kúshteri jedel túrde shyqty. Jeke quramnyń 4 adamy, 1 tehnıka jáne 1 júzý quraly jumyldyryldy, - dep habarlady Pavlodar oblysy tótenshe jaǵdaılar departamentiniń baspasóz qyzmetinen.

Іzdeý sharalary jalǵasýda. Ózen akvatorııasy men jaǵalaý aımaǵyna tekserý júrgizilip jatyr. 

Eske sala keteıik, Ertis ózeninde keme kapıtany sýǵa batyp ketti.