Ertis ózeninde 23 sáýirden kemeler qatynaı bastaıdy
PAVLODAR. KAZINFORM - Navıgatsııalyq kezeńniń alǵashqy kúni kemeler tek ózenniń joǵarǵy jaǵynda – Maıtúbek – Pavlodar qalasy baǵytynda ǵana qatynaı alady. Odan soń Pavlodar – Tómengi Alekseevskıı (RF shekarasy) baǵyty ashylady dep josparlanyp otyr.
QR Kólik mınıstrligi Temirjol kóligi jáne sý kóligi komıtetiniń «Qazaqstan sý joldary» kásipornynyń Pavlodar fılıaly habarlaǵandaı, kelesi aptada Ertis ózeninde navıgatsııalyq kezeń bastalady. Qarasha aıyna deıin pavlodarlyq kásipkerler sý ústi jolymen Abaı, Shyǵys Qazaqstan oblystaryna jáne Reseı Federatsııasyna óz júkterin tolassyz jetkizip, alys-beris eselene túsedi.
Pavlodar oblysy boıynsha kóliktik baqylaý ınspektsııasynyń bas mamany Ernur Eslaýdyń málimetinshe, navıgatsııalyq kezeń eń áýeli 23 sáýir kúni Ertis ózeniniń joǵary jaǵynda ashylady.
«Maıtúbek – Pavlodar qalasy baǵytynda kemelerdiń sýda júzýine ruqsat beriledi. Al 24 sáýirden Pavlodar – Tómengi Alekseevskıı (RF shekarasy) baǵytynda sý kólikteri tolassyz júre alady. Qazirgi ýaqytta bizdiń ınspektsııanyń arnaıy esebinde Pavlodar oblysy boıynsha úlken kólemdi 102 sý kóligi tirkelgen. Olardyń ishinde eki keme jolaýshylar tasymalyna arnalǵan. Pavlodar ózen vokzaly bul quraldardy ózen ústindegi jolaýshylar serýenin uıymdastyrý úshin paıdalanyp keledi. Ózgesi - júk tasýǵa, sý joldaryna arnalǵan sý kólikteri. Qazirgi ýaqytta ishki sý joldarynyń jaǵdaıy «Qazaqstan sý joldary» uıymynyń jergilikti fılıalynyń mamandary arqyly tekserilip jatyr», - deıdi ınspektsııa ókili.
E.Eslaýdyń sózinshe, ishki sý joldary arqyly júk jáne jolaýshylar tasymaldaıtyn ózen kólikteriniń qyzmetkerleri ýaqyt saıyn biliktiligi men deńgeıin arttyryp otyrýy kerek. Mysaly, keme kapıtany bes jylda bir márte attestattaýdan ótedi. Al onyń kómekshileri men mehanıkterge jáne t.b. mamandarǵa óz deńgeıin arttyrý úshin dıplomdaý júıesi qarastyrylǵan. Byltyr 14 kapıtan óz deńgeıin dáleldese, bıyl jyl basynan taǵy 8 kapıtan attestattaýdan ótken. Al 33 keme mamany óz deńgeıin kóterýge múmkindik aldy.
«Ózen qaıyqtary da arnaıy esepke alynady. Mundaı sý kólikteriniń jalpy sany – 1454. Deıturǵanmen bul esepke salmaǵy 200 keliden, qozǵaltqyshynyń qýattylyǵy 10 attyń kúshinen asatyn shaǵyn kólemdi qaıyq quraldary ǵana enedi. Al esepke tirkelgen sýda júzý quraldaryn basqarýshyda arnaıy júrgizýshi kýáligi, keme bıleti bolýy mindetti. Arnaıy esepke jatpaıtyn shaǵyn qaıyqtar esh tirkeýsiz júre berýine bolady», - dep tolyqtyrdy maman.
Eske sala keteıik, Pavlodar oblysynda 15 sáýirden bastap balyq aýlaýǵa ýaqytsha tyıym salyndy.
Atalǵan shekteý 30 mamyrǵa deıin kúshinde saqtalady. Osy ýaqyt aralyǵynda Ertis ózeni men ózge de sý aıdyndarynda úlken kemelerden ózge sý kólikteriniń júzýine ruqsat joq. Jalpy kez kelgen sý kóliginde dári-dármek qobdıshasy, sý tógýge jáne qutqarýǵa arnalǵan quraldar, eskek bolýy mindetti. Bul erejeni oryndamaǵandarǵa 5 aılyq eseptik kórsetkish mólsherinde aıyppul salynatynyn este ustaǵan jón. Sondyqtan jazǵy ýaqytta qarapaıym ǵana rezeńke qaıyqtyń ózimen ózen-kólderdiń ústine shyǵa qalsańyz, bul erejelerińizdi umytpańyz.
