«Ertis» óz oıynshylaryna qaryz: klýb basshylyǵy málimdeme jasady

PAVLODAR. KAZINFORM — Áleýmettik jelide pavlodarlyq «Ertis» klýby fýtbolshylar men qyzmetkerlerine jalaqy boıynsha qaryz ekeni týraly aqparat tarap ketti. 

Telegram arnasynda jarııalanǵan jazbaǵa súıensek, Qazaqstan premer-lıgasyna joldama alǵan «Ertis» komandasy óz oıynshylary men qyzmetkerlerine mıllıondaǵan teńge qaryz. Ári bes aıdan beri syıaqylar tólenbeı kelgen. Buǵan qosa pavlodarlyq klýbtyń bıylǵy Birinshi lıgadaǵy bıýdjeti 1 mlrd 332 mln teńge bolǵany kórsetilgen.

Atalǵan aqparatqa qatysty «Ertis» FK resmı málimdeme jasady.

— Klýbtyń oıynshylary men qyzmetkerleri aldynda jalaqy boıynsha eshqandaı bereshegi joq. Áleýmettik jelide taralǵan aqparat shyndyqqa janaspaıdy. Fýtbolshylar, jattyqtyrýshylar jáne ákimshilik personal aldyndaǵy barlyq qarjylyq mindetteme tolyq, ári belgilengen merzimde oryndalǵan.

Oıynshylardyń FIFA-ǵa júginýge daıyndalyp jatyr degen aqparat ta jalǵan ekendigin málimdeımiz. «Ertis» fýtbol klýby jumysyn jalǵastyryp, kelesi maýsymǵa daıyndyqqa basa nazar aýdaryp otyr, — dep habarlady klýbtan.

Eske sala keteıik, Qazaqstan Premer-lıgasyna joldama alǵan 3 komanda belgili boldy. Olarydń qatarynda «Ertis» komandasy da bar.