Ertis ormanshylary qaraǵaı kóshetterin otyrǵyzý úshin kóktemgi ylǵal jınaýdy bastady

PAVLODAR. KAZINFORM – Bıyl rezervat aýmaǵynda 125 myńnan astam jas qaraǵaı egiledi. Ormanshylar búginde qar úıindilerin jasap, shóppen jaýyp jatyr.

«Ertis ormany» mekemesiniń baspasóz qyzmetkeri Araı Atyǵaevanyń aıtýynsha, qar úıindileri sáýir aıynda jas qaraǵaı kóshetterin otyrǵyzǵan ýaqytta ylǵal úshin paıdalanylady.

«Qaraǵaı kóshetteri otyrǵyzylatyn tanaptarǵa qardy úımelep jınaımyz da, ústin qalyń shóppen jaýyp tastaımyz. Kómilgen qar kóktemde uzaq ýaqyt erimeı jatady. Sáýir aıynda jas kóshetterdi otyrǵyza bastaǵanda tamyryn qar kesekterimen birge kómemiz. Bul ádis kóshetterdiń tamyryna kópke deıin ylǵal berip turýǵa arnalǵan», - dep túsindirdi maman.

«Ertis ormanynyń» 7 ormanshylyǵynda jalpy sany 48 qar úıindisi jasalmaq. Bıyl munda jalpy aýmaǵy 2828 gektar jerge 128,6 myń túp qaraǵaı kóshetteri salynady.