«Ertis ormanyndaǵy» qaraǵaı arasynan sileýsin kózge tústi

PAVLODAR. KAZINFORM - Sileýsin adam kózine jıi túse bermeıtin jyrtqysh ań. Ormanshylardyń esebinshe, Pavlodar oblysynda shamamen 100-den astam sileýsin bar.

Soltústiktegi jalqaraǵaı ormandary arasyn kezekti patrýldeý kezinde memlekettik ınspektorlar sileýsindi keziktirip, kameraǵa túsirip alǵan.

«Ertis ormany» rezervatynyń baspasóz qyzmetkeri Araı Atyǵaevanyń aıtýynsha, mysyq tuqymdas ań kúnine 30 shaqyrym jerdi basyp óte alady.

«Óte shapshań ári sybdyrsyz júredi, sekirgende 4-5 metr jerge baryp túsedi. Kúnine eki kılogramǵa deıin et jeıdi. Al qulaq qalqanynyń úshburyshty bolýynyń da ózindik sebebi bar, onyń kómegimen qaýip tónip kele jatqany týraly aldyn ala bilip otyrady. Bul óte saq janýar, tipti qardyń ústinde iz qaldyrmaı ketetin kezderi bolady»,-deıdi ol.

Rezervatta aldyńǵy jyly shamamen 60-tan astam sileýsin sanalǵan.

Jyrtqysh ań Pavlodar oblysynyń Baıanaýyl aýdanynda da bar. Onda ótken jyly 40-tan astamy tirkelgen. Ulttyq parktiń memlekettik ınspektory, ólketanýshy Altynbek Qurmanov sileýsinder qysta jıi kózge túsetinin aıtady.

«Kóbine taýda qoıan aýlap jeıdi. Baıanaýylda qys aılarynda demalýshylar bolmaıdy. Sondyqtan ańdardyń kóbi eldi mekenderge jaqyn ormandarǵa da kele bastaıdy. Birli-jarym usaq malǵa da shabýyldaýy múmkin», deıdi ol.