«Ertis ormanynda» jabaıy janýarlarǵa qysqy azyq oryndary daıyndalyp jatyr
PAVLODAR. KAZINFORM — Ormanshylar túz taǵylaryna azyq uıymdastyrýdy «bıotehnıkalyq is-shara» dep ataıdy. Bıyl rezervat boıynsha 61 azyqtandyrý orny bar.
«Ertis ormany» rezervatynda qysqy tabıǵatqa jáne janýarlar álemine qamqorlyq jasaý jumystary úzilgen emes. Qazirgi ýaqytta qysqy bıotehnıkalyq is-sharalar aıasynda janýarlardy azyqpen qamtamasyz etý jáne aýmaqty baqylaý sharalary júrgizilip jatyr.
— Ańshylyqtanýshylar jabaıy janýarlar úshin bıyl 25 tonna shóp, 3000 dana butaq býmalaryn, 600 kılogramm tuz daıyndady. Qysta janýarlar júretin soqpaq joldar anyqtalyp, sol mańdaǵy aǵashtarǵa azyq ilinedi. Bul tásil, ásirese elik, buǵy, qoıan sekildi ańdar úshin tıimdi. Rezervat aýmaǵynda 61 arnaıy azyqtandyrý alańy bar. Qysta qar qalyń bolǵan ýaqytta, boran soqqanda mundaı azyq oryndary janýarlardyń qorektenýine múmkindik beredi, — dep habarlady rezervattan.
Aıryqsha qorǵalatyn orman aýmaǵynda ańshylyqtyń barlyq túrine qatań tyıym salynǵan. Munda sútqorektilerdiń 21 túri, qustyń 90, baýyrymen jorǵalaýshylardyń 3 jáne 32 jándik túri tirkelgen. Ormanda Qyzyl kitapqa engen orman sýsary da mekendeıdi.
Eske sala keteıik, Reseı Federatsııasynyń Novosibir oblysy tarapynan Pavlodar óńirine elikterdiń jappaı kóshi-qony baıqalyp otyr. Janýarlardyń birazy Novosibirdiń Qarasýyq aýdanyndaǵy kólde qatqan muzdan óte almaı qyrylǵan.