Ertis ormanynda soqyrtyshqan kózge tústi
PAVLODAR. KAZINFORM - Orman rezervatynda kádimgi soqyrtyshqan vıdeoǵa tústi. Jer astynda ómir súretin bul usaq kemirgish topyraqtyń qurylymyna áser etip, ormandy-dala ekojúıesindegi tabıǵı úderisterge qatysady.
Mamandardyń aıtýynsha, kádimgi soqyrtyshqan (Ellobius talpinus) — Eýrazııanyń dalalyq jáne ormandy-dala aımaqtaryn mekendeıtin usaq kemirgish. Ol negizinen jer astynda tirshilik etip, topyraqta kúrdeli inder júıesin qazady.
Soqyrtyshqannyń ereksheligi – ómiriniń basym bóligin jer astynda ótkizýi. Іn qazý arqyly topyraqty qopsytyp, aýa almasýyna yqpal etedi. Sondaı-aq topyraq bólshekterin qozǵap, jer bederiniń shaǵyn pishinderiniń qalyptasýyna áser etýi múmkin.
- Bul kemirgish ósimdikterdiń jer astyndaǵy bólikterimen, sonyń ishinde tamyrlarymen, pııazshyqtarymen jáne túınekterimen qorektenedi. Sondyqtan onyń tirshiligi jekelegen aýmaqtardaǵy ósimdik jamylǵysynyń quramyna da yqpal etýi yqtımal, - dep habarlady rezervattan.
Buǵan qosa atalǵan jándik keıbir jyrtqysh sútqorektiler men qustarǵa qorek bolady. Osy arqyly tabıǵı qorektik tizbektiń saqtalýyna qatysady.
Osylaısha, syrt kózge baıqala bermeıtin soqyrtyshqannyń tirshiligi Ertis ormany rezervatyndaǵy tabıǵı tepe-teńdikpen tyǵyz baılanysty. Ony zertteý topyraq pen ósimdik jamylǵysynyń ózara baılanysyn jáne ekojúıedegi tabıǵı úderisterdi tereńirek túsinýge múmkindik beredi.
Buǵan deıin Ertis ormanynda bulan kóbeıe túskenin, janýarlardyń ekojúıege tıgizetin paıdasy týraly jazǵanbyz.
