«Ertis ormanynda» sileýsinniń tólderi kózge tústi
PAVLODAR. KAZINFORM — Qaraǵaıly orman rezervatynda sileýsinniń kúshigi — máshinder beınejazbaǵa tústi. Aýmaqtaǵy mysyq tuqymdas janýarlardyń sany 70-ke jýyqtaıdy.
Rezervat aýmaǵyndaǵy kezekti baqylaý kezinde ormanshylar sileýsin apanyndaǵy máshinderin túsirip aldy.
— Sileýsin — jyrtqysh ań. Máshinderdiń dúnıege kelýi — janýarlardyń ózderin qaýipsiz sezinetin, tirshiligi turaqty tabıǵı ortanyń belgisi. «Ertis ormany» — jabaıy tabıǵattyń senimdi mekeni. Tabıǵatty birge qorǵaıyq, — dep habarlady rezervattyń baspasóz qyzmetinen.
Pavlodar oblysynda sileýsinder Baıanaýyl aýdanyndaǵy taýly jerlerde jáne «Ertis ormanynda» kezdesedi. Mysyq tuqymdas jyrtqyshtyń uzyndyǵy 87-104 sm, salmaǵy 13,2-23,2 kg aralyǵynda bolady. Dene tulǵasy myǵym ári jumyrlanyp keledi. Qulaq qalqany úshburyshty ári úshkir. Tyrnaqtary men tisteri jaqsy damyǵan ári ótkir, kózi óte qyraǵy, estý qabileti de jaqsy damyǵan. Júrgen kezde eshbir dybys shyǵarmaıdy. Ol aǵash basyna jáne jartastarǵa jyldam órmelep shyǵa alady. Qatty sekirgen kezde 3,5-4 metr qashyqtyqtyqqa baryp túsedi. Sileýsin eki jasta jynystyq jetiledi.
Sileýsinniń kúshigin qazaq halqy «máshin», «insin» dep ataǵan.
Eske sala keteıik, «Ertis ormanynda» órt qaýiptiliginiń tótenshe deńgeıi jarııalandy.