Ertis ormanynda sarǵylt qundyzshóp qaıta gúldep jatyr
PAVLODAR. KAZINFORM — Atalǵan ósimdiktiń bir maýsymda ekinshi márte gúldeýi erekshe fenologııalyq qubylys retinde sanalady.
Mamandardyń aıtýynsha, oǵan temperatýralyq rejım men ózge de meteorologııalyq jaǵdaılardyń jıyntyǵy áser etken.
Tamyz aıynyń úshinshi onkúndigi men qyrkúıek aıynyń basynda «Ertis ormany» rezervaty aýmaǵynda qundyzshóptiń (Pulsatilla patens) qaıtalaı gúldegeni baıqaldy.
— Gúldiń mundaı túri kún salqyndaǵanyna qaramastan kesh gúldeýi erekshe fenologııalyq qubylys. Onyń qaıtadan búrshik jarýyna qalyptasqan tabıǵı-klımattyq faktorlardyń úılesimi yqpal etýi múmkin. Atap aıtqanda, aýa temperatýrasynyń táýliktik edáýir aýytqýy baıqaldy: túngi ýaqytta temperatýra +5…+7 °C-qa deıin tómendegenimen, kúndizgi jaǵdaılar qolaılyraq boldy, — dep habarlady rezervattan.
Temperatýralyq rejım men basqa da meteorologııalyq jaǵdaılardyń jıyntyǵy jekelegen ósimdikterdiń generatıvtik damýynyń qaıta bastalýyna yqpal etken faktor bolýy yqtımal. Alaıda qaıtalama gúldeýdiń tikeleı sebebin anyqtaý úshin ári qaraı fenologııalyq baqylaýlar júrgizip, olardyń nátıjelerin meteorologııalyq derektermen salystyrý qajet deıdi mamandar.
Bul baqylaý Pulsatilla patens túriniń fenologııalyq erekshelikterin monıtorıngileý jáne onyń ózgerip otyrǵan tabıǵı-klımattyq jaǵdaılarǵa reaktsııasyn baǵalaý turǵysynan ǵylymı qyzyǵýshylyq týdyryp otyr.
Buǵan deıin Ertis ormanynda kólik sońynan tura júgirgen bulan jurtty tańǵaldyrǵany týraly jazǵanbyz.
