«Ertis ormanynda» órt qaýiptiliginiń tótenshe deńgeıi jarııalandy
PAVLODAR. KAZINFORM — Óńirde aptap ystyq bastalǵanyna baılanysty qaraǵaıly memlekettik orman qory rezervatynyń aýmaǵynda órt qaýiptiliginiń eń joǵary deńgeıi belgilendi.
Bul týraly «Ertis ormany» memlekettik rezervatynan habarlady.
— Orman tabıǵı rezervatynyń memlekettik orman qory aýmaǵynda órt qaýiptiliginiń tótenshe deńgeıi jarııalandy, 5-klasty deńgeı. Ormandy jerlerde qaýipsizdik sharalaryn saqtaýdy suraımyz, — dep habarlady rezervattan.
Mamandar ormanda ot jaǵýǵa qatań tyıym salynatynyn eskertti. Temeki tuqylyn, shyny qaldyqtaryn, bos shólmekterdi, qoqysty tastaýǵa bolmaıdy. Ári orman ishinde kólikpen júrýge tyıym salynǵan.
— Orman órtteriniń aldyn alý — basty mindet. «Ertis ormany» rezervaty aýmaǵynda aqparattyq-túsindirý jumystary jalǵasýda. Atap aıtqanda, ormanshylarmen birlesip, órt qaýipsizdigine baılanysty anshlagtar jańartylyp, turǵyndar úshin eskertý materıaldary ornatylyp jatyr. Maqsat — halyqtyń nazaryn órt qaýpine aýdarý jáne tabıǵatty saqtaýǵa shaqyrý, — dep qosty orman mekemesinen.
Turǵyndar ormannan órt nemese tútindi baıqasa, 101 nemese 112 nómirine, ne bolmasa +7 705 601 96 80 uıaly telefon nómiri boıynsha rezervattyń kezekshi bólimine habarlassa bolady.
Eske sala keteıik, Ertis ormanynda sırek kezdesetin tarǵaq qusy kózge tústi.
