«Ertis ormanynda» órt qaýiptiliginiń tótenshe deńgeıi jarııalandy

PAVLODAR. KAZINFORM — Aptap ystyqqa baılanysty qaraǵaıly memlekettik orman qory rezervatynyń aýmaǵynda órt qaýiptiliginiń tótenshe deńgeıi belgilendi.

Bul týraly «Ertis ormany» memlekettik rezervatynan habarlady.

— Orman tabıǵı rezervatynyń memlekettik orman qory aýmaǵynda órt qaýiptiliginiń tótenshe deńgeıi jarııalandy, 5-klasty deńgeı. Ormandy jerlerde qaýipsizdik sharalaryn saqtaýdy suraımyz, — dep habarlady rezervattan.

Mamandar ormanda ot jaǵýǵa qatań tyıym salynatynyn eskertti. Temeki tuqylyn, shyny qaldyqtaryn, bos shólmekterdi, qoqysty tastaýǵa bolmaıdy. Ári orman ishinde kólikpen júrýge tyıym salynǵan.

— Orman órtteriniń aldyn alý — basty mindet. «Ertis ormany» rezervaty aýmaǵynda aqparattyq-túsindirý jumystary jalǵasýda. Atap aıtqanda, ormanshylarmen birlesip, «órt qaýipsizdigine baılanysty anshlagtar jańartylyp, turǵyndar úshin eskertý materıaldary ornatylyp jatyr. Maqsat — halyqtyń nazaryn órt qaýpine aýdarý jáne tabıǵatty saqtaýǵa shaqyrý, — dep qosty orman mekemesinen.

Eske sala keteıik, Ertis boıy orman sharýashylyqtarynyń órtke qarsy áleýeti álsiz.