Ertis ormanynda orman órti jańa júıeniń kómegimen jyldam anyqtaldy
PAVLODAR. KAZINFORM - Órtti orman arasynda oınap júrgen balalar abaısyzda tutandyryp alǵan. Olardyń ata-analaryna 20 aılyq eseptik kórsetkish mólsherinde aıyppul salynyp, materıaldar sotqa jiberildi.
«Ertis ormany» rezervatyndaǵy Shaldaı ormanshylyǵy 124-oramynda orman kúzetiniń ınspektorlary men Sharbaqty aýdanynyń Tótenshe jaǵdaılar basqarmasy jáne polıtsııa bóliminiń qyzmetkerleri órtti erte anyqtaý júıesiniń kómegimen orman órtin anyqtady.
«Bul júıe tabıǵı rezervattaǵy orman alqabynyń, sondaı aq eldi mekender aýmaǵyndaǵy jaǵdaıdy táýlik boıy qashyqtan baqylaýǵa múmkindik beredi. Kámeletke tolmaǵan balalardyń otpen abaısyzdyǵy órtke sebep bolǵany belgili bolǵan. Órt sóndirýshilerdiń jedel áreketiniń arqasynda tilsiz jaý tez sóndirildi. Jalyn sharpyǵan aýmaq – 0,01 gektar», - dep habarlady «Ertis ormany» rezervatynan.
Eske sala keteıik, Ertis ormandarynda sáýir aıynan bastap órtti erte anyqtaý júıesi iske qosyldy. Bul maqsatqa bıýdjetten 2 mlrd teńge bólingen. Ol úshin rezervat aýmaǵynda 23 bıik munara turǵyzylyp, qajetti jabdyqtar ornatyldy. Orman órtterin erte anyqtaý júıesi – orman monıtorıngine arnalǵan baǵdarlamalyq-apparattyq keshen. Ol shuǵyl túrde is-sharalardy qabyldaýǵa jáne órt qaýiptiligi joǵary maýsymynda orman órtterinen bolatyn zalaldy aıtarlyqtaı azaıtýǵa múmkindik beredi. Órtti anyqtaý táýlik boıy 360 gradýsqa qaraıtyn jáne 30 km-ge deıingi radıýsta jaǵdaıdy tirkeıtin beınebaqylaý kameralarynyń kómegimen júzege asyrylady. Baqylaý aýmaǵy 10 myń gektarǵa deıin jetedi.
Oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe byltyr óńirde orman órtterinen kelgen shyǵyn 240 mln teńge boldy.
