Ertis ormanynda kólik sońynan tura júgirgen bulan jurtty tańǵaldyrdy
PAVLODAR. KAZINFORM - Ormanshylar bulannyń bulaısha erekshe minez-qulyq tanytýy kúıek kezeńiniń bastalýymen baılanysty bolýy múmkin ekenin aıtady. Bul kezeńde janýarlardy qýalaýǵa, tamaqtandyrýǵa nemese úrkitýge bolmaıdy.
Ertis ormany aýmaǵynda bulannyń atalyǵy júrip bara jatqan kólikti baıqap, biraz ýaqyt onyń sońynan júgirgeni kameraǵa túsip qaldy.
Ádette orman alańqaılarynda aınalasyna mán bermeı tynysh qana jaıylyp júre beretin syrbaz janýardyń erekshe minez-qulqy kópti tańǵaldyryp otyr.
- Kadrlarda eresek atalyq bulan beınelengen. Janýardyń mundaı erekshe minez-qulqy kúıek kezeńiniń bastalýymen baılanysty bolýy múmkin. Bul ýaqytta atalyq bulannyń belsendiligi artyp, óz aýmaǵyn qorǵaýǵa erekshe mán beredi. Boljam boıynsha, sol ýaqytta jaqyn mańda analyq bulan júrýi de múmkin. Atalyq ony qorǵaýǵa tyrysyp, qozǵalyp kele jatqan avtokólikti yqtımal qaýip nemese qarsylas retinde qabyldasa kerek, - dep túsindirdi rezervat mamandary.
Mamandar kúıek kezeńinde jabaıy janýarlardyń minez-qulqy tosyn ári qaýipti bolýy múmkin ekenin eskertedi. Bulandy kezdestirgen jaǵdaıda oǵan jaqyndamańyz, kólikten shyqpańyz jáne onyń nazaryn aýdarýǵa tyryspańyz. Qaýipsiz qashyqtyqty saqtap, janýarǵa erkin ketýge múmkindik bergen durys.
Eske sala keteıik, Ertis-Baıan óńirinde búginde 300-ge jýyq bulan bar.
Kúzden bastap Ertis ormany aýmaǵyna kirý aqyly bolady.
