Ertis ormanynda buzaýymen sýatqa kelgen bulan fototuzaqqa túsip qaldy
PAVLODAR. KAZINFORM - Pavlodar óńirinde sońǵy jyldary bulan kóbeıe túsýde. Altaı aýyp kelgen janýar Ertis ormany rezervaty men Baıanaýyldaǵy ulttyq park aýmaǵyn mekendeıdi.
Ertis ormany rezervatynda buzaýymen sýatqa kelgen bulan beınejazbaǵa túsip qaldy. Orman qorǵaý mekemesiniń mamandary ornatqan beınekamerada janýardyń emin-erkin jaıylyp júrgeni baıqalady.
Ańshylyqtanýshylar orman alańshyqtaryndaǵy sý kózderin únemi tazartyp otyrady. Ormanshylarydń aıtýynsha, bul sońǵy jyldardaǵy qurǵaqshylyq kezeńinde óte mańyzdy sharýa. Ormanda sý kóp bolsa, rezervat aýmaǵyn mekendeıtin janýarlar úshin orta jaıly bola túsedi. Búginde rezervat aýmaǵynda shamamen 50-den astam jasandy sýat bar.
Sońǵy esepterge súıensek, Shaldaı ormandarynda 193 bulan men 720 elik bar. Tuıaqty janýarlar kóbine ormannyń alańshyqtaryn mekendeıdi.
Eske sala keteıik, Pavlodarda elik atqandar sottaldy.
