«Ertis ormanynda» asa sırek kezdesetin qus — saqaldy japalaq kózge tústi
PAVLODAR. KAZINFORM — Mamandardyń aıtýynsha, saqaldy japalaq sońǵy ret 2015 jyly Soltústik Qazaqstanda tirkelgen. Ol — elimizde asa sırek kezdesetin qustyń biri.
«Ertis ormany» memlekettik tabıǵı rezervaty aýmaǵynda óte sırek kezdesetin qustyń biri — saqaldy japalaq (borodataıa neıasyt) kameraǵa túsip qaldy.
— Japalaqtyń bul túriniń fotoǵa túsirilýi Qazaqstan aýmaǵynda nebári úsh ret qana tirkelgen. Sońǵy fototirkeý 2015 jyldyń 10 qazany kúni Soltústik Qazaqstanda bolǵany anyqtaldy. Saqaldy japalaq — sırek kezdesetin, negizinen otyryqshy tirshilik etetin qus, — dep habarlady «Ertis ormany» rezervatynan.
Ádebı derekterde 1987 jylǵy 27 tamyzda úsh balapannan quralǵan uıa mańyndaǵy toptyń tirkelgeni kórsetilgen.
Bul olja rezervattyń ornıtologııalyq bıoalýantúrliligin zertteý úshin mańyzdy ǵylymı derek deıdi orman qyzmetkerleri. Aldaǵy jyly saqaldy japalaqtyń tirshilik erekshelikterin, bıologııasyn, taralý aýmaǵyn zerttep, uıa salatyn ornyn anyqtaý josparlanyp otyr.
Buǵan deıin Ertis ormanynda soqyrtyshqan kózge túsken. Jer astynda ómir súretin bul usaq kemirgish topyraqtyń qurylymyna áser etip, ormandy-dala ekojúıesindegi tabıǵı úderisterge qatysady.
Sondaı-aq Ertis ormanynda bulannyń kóbeıýi ekojúıege aıtarlyqtaı paıdasyn tıgizip jatqanyn jazǵanbyz.
