«Ertis ormanynda» 2029 jylǵa deıin aǵash kesýge tyıym salyndy
PAVLODAR. KAZINFORM - «Ertis ormany» tabıǵı rezervatynda 2029 jylǵa deıin aǵashtyń barlyq túrin kesýge tyıym salyndy. Bul týraly Orman sharýashylyǵy jáne janýarlar dúnıesi komıtetiniń arnaıy buıryǵy shyqty.
QR Ekologııa jáne tabıǵı resýrstar mınıstrligi orman sharýashylyǵy jáne janýarlar dúnıesi komıteti tóraǵasynyń 10 qyrkúıektegi 27-03/249-NQ buıryǵymen «Ertis ormany» memlekettik orman tabıǵı rezervaty aýmaǵynda aǵash kesýdiń barlyq túrine tyıym salyndy.
«Osy buıryq qoldanysqa engizilgen kúnnen bastap 2029 jylǵy 1 qańtarǵa deıin «Ertis ormany» memlekettik orman tabıǵı rezervaty respýblıkalyq memlekettik mekemesine memlekettik orman qory ýchaskelerindegi ekpelerde orman kesýdiń barlyq túrlerine (ótimdi qoqystardy jınaýdan, tilmelerdi kesýden jáne orman kútimin kesýden basqa) tyıym salý engizilsin»,- delingen qujatta.
Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasy atalǵan buıryqtyń oryndalýyn baqylaýdy qamtamasyz etedi.
«Ertis ormany» rezervaty Shaldaı jáne Besqaraǵaı orman sharýashylyqtarynan, onyń ishinde 16 ormanshylyqtan turady. Orman jamylǵysynyń jalpy aýmaǵy 177 myń gektar. Qorǵalýy jaǵynan asa qundy orman alqaptary sanatyna jatady. 2023 jyly prokýratýra rezervat aýmaǵynan 331 tekshe metr kóleminde zańsyz aǵash kesilgenin anyqtady.
Eske sala keteıik, jyl basynda «Ertis ormany» basshysy para aldy degen kúdikpen qamaýǵa alyndy.
Keıin Ertis ormanyn otap satqan bas dırektor 150 mln teńge zalal ákelgeni anyqtaldy.
Buǵan deıin rezervat aýmaǵyndaǵy eski stansalar men tehnıkalardyń máselesi týraly taldap jazǵan edik.
