Ertis ormanyna túlkiler qaıta oralyp jatyr
PAVLODAR. KAZINFORM — Budan biraz ýaqyt buryn erekshe qorǵalatyn qaraǵaı alqaptarynda túlkiler joǵalyp ketken. Túz taǵysynyń qaıta oralýy ekojúıede qolaıly jaǵdaılar qalyptasyp otyrǵanyn bildiredi.
«Ertis ormany» memlekettik orman tabıǵı rezervatynyń aýmaǵynda ǵylym bóliminiń mamany ormandaǵy óte saq janýar — túlkini fotoǵa túsirip aldy.
— Rezervat aýmaǵynda túlkiniń paıda bolýy — ekojúıeniń qolaıly jaǵdaıynyń mańyzdy kórsetkishi. Bul jyrtqyshtar kemirgishterdiń sanyn rettep, tabıǵı tepe-teńdikti saqtaýda erekshe ról atqarady, — dep habarlady rezervattyń baspasóz qyzmetinen.
Túlki — eń aqyldy ári beıimdelgish jyrtqyshtardyń biri. Óte jaqsy damyǵan estý qabiletiniń arqasynda ol qar astyndaǵy bolmashy sybdyrdyń ózin ańǵaryp, jemtiginiń ornyn dál anyqtaı alady. Qysta onyń qalyń júni burynǵydan da úlpildep, tyǵyz bola túsip, qaqaǵan aıazdan senimdi qorǵaıdy.
Mamandar «Ertis ormanynyń» jabaıy tabıǵatynyń sonshalyqty baı ári alýan túrli ekenin, oǵan turǵyndar uqyppen, janashyrlyqpen qaraý mańyzdy ekenin aıtady.
Buǵan deıin Ertis ormany aýmaǵynda jońǵar atjalmany kózge túsken edi.