Ertis ormanyna qaýip tóndirgen jibek kóbelegi: qaraǵaılardy óńdeý jumystary bastaldy
PAVLODAR. KAZINFORM - Qaraǵaı alqaptary «Dıýron» preparatymen óńdelip jatyr. Іs-shara qylqan japyraqty ormandarǵa zııan keltiretin qaýipti zııankestiń sanyn azaıtýǵa jáne taralýyn shekteýge baǵyttalǵan.
«Ertis ormany» memlekettik orman tabıǵı rezervatynyń Maraldy ormanshylyǵy aýmaǵynda qaraǵaı jibek kóbeleginiń (Dendrolimus pini) belsendi oshaqtaryna qarsy avıatsııalyq hımııalyq óńdeý jumystary júrgizilýde.
- Hımııalyq óńdeý qylqan japyraqty ormandarǵa zııan keltiretin qaýipti zııankesterdiń sanyn azaıtýǵa jáne taralýyn shekteýge baǵyttalǵan. Óńdeý jumystary ormanopatologııalyq zertteý nátıjesinde zııankes oshaqtary anyqtalǵan ýchaskelerde qolǵa alyndy, - dep habarlady rezervattyń baspasóz qyzmetinen.
Mamandardyń aıtýynsha, qorǵanys sharalaryn júrgizý orman qorynyń zaqymdaný qaýpin tómendetip, rezervattaǵy orman alqaptarynyń sanıtarlyq jaǵdaıyn saqtaýǵa múmkindik beredi.
Buǵan deıin ekologtar «Ertis ormanyn» jibek kóbelegi basyp bara jatqanyn aıtyp, dabyl qaqqan edi.
