«Ertis ormany» rezervatynda 12 mln-nan astam qaraǵaı kósheti otyrǵyzylady

PAVLODAR. KAZINFORM - Qazirgi ýaqytta rezervat aýmaǵynda mańyzdy agrotehnıkalyq kezeń – otyrǵyzý materıalyn daıyndalǵan jer telimderine kóshirý júrgizilip jatyr.

Memleket basshysynyń elimizdi jappaı kógaldandyrý jónindegi tapsyrmasy aıasynda 2 mıllıard aǵash otyrǵyzý josparlanǵan. 

Osy ıgi bastamaǵa «Ertis ormany» memlekettik orman tabıǵı rezervaty óz úlesin qosýda.

- Biz jyl saıyn 12 mıllıonnan astam kádimgi qaraǵaı kóshetin otyrǵyzamyz. Bıylǵy jyly da bul jumys qarqyndy jalǵasýda. Eki jyldyq kóshetterdi qazyp alý - ormandy qalpyna keltirý sharalarynyń eń jaýapty sátteriniń biri. Kóshetter berik tamyr júıesimen, sapasyna qaraı irikteledi. Odan soń jazyq ýchaskelerde mehanıkalandyrylǵan ádis qoldanylady. Bul eńbek ónimdiligin arttyrady. Tehnıkanyń kirýi qıyn jerlerde qolmen otyrǵyzylady. Kóshet tamyrlary tik ornalasyp, topyraq myqtap tyǵyzdalady. Qazaq orman ornalastyrý kásiporynynyń jobasyna sáıkes, «Ertis ormany» rezervatynda aǵash otyrǵyzý kólemi 2114,5 gektardy quraýy tıis edi. Degenmen, 2024 jyly bekitilgen «Taza Qazaqstan» tujyrymdamasyna sáıkes, bul kólem 2500 gektarǵa deıin ulǵaıtyldy,-dep habarlady rezervattyń baspasóz qyzmetinen.

Buǵan qosa Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń qoldaýymen «Ertis ormany» zamanaýı órt sóndirý jabdyqtarymen tolyq jaraqtalǵan arnaıy tehnıkalarmen qamtamasyz etilip jatyr. Jýyqta avtopark 34 birlik shaǵyn órt sóndirý keshenderimen jáne 15 traktormen tolyqty. Bul tehnıkalar orman órtteriniń aldyn alý, patrýldik baqylaý, monıtorıng júrgizý jáne tótenshe jaǵdaılarǵa jedel áreket etý jumystaryn tıimdi júzege asyrýǵa múmkindik beredi. Bıyl qosymsha 34 birlik ATs-3 markaly órt sóndirý mashınalaryn satyp alý josparlanǵan.

Eske sala keteıik, «Ertis ormanynda» 2029 jylǵa deıin aǵash kesýge tyıym salyndy.

Sońǵy bes jylda Ertis ormanynyń 2 myń tekshe metri otalyp ketken.