Ertis kópirindegi kólik keptelisi: Óskemende kópir astyndaǵy jol qurylysy bıyl aıaqtalmaq
ÓSKEMEN. KAZINFORM – Óskemen qalasynda Ertis kópiri astyndaǵy jol bıyl paıdalanýǵa beriledi.
Qaladaǵy Ertis kópirinde únemi tańerteń jáne keshke uzyn-sonar kólik keptilisi bolady. Sebebi halyq kóp turatyn Jibek matalar kombınaty yqshamaýdanyna aparar negizgi jol osy.
Sol keptelisti azaıtý maqsatynda Permıtın kóshesinen Slavskıı jaǵalaýyna qaraı ótetin Ertis kópiri astynda jol qurylysy bastalǵan bolatyn.
- Bul joba qaladaǵy qozǵalysty jeńildetip, ásirese kópir mańyndaǵy aınalma joldaǵy kólik júktemesin azaıtýǵa múmkindik bermek. Qurylys jumystary 2023 jyldyń qarasha aıynda bastalǵan. Alaıda byltyr jazda belgili bir sebepterge baılanysty ýaqytsha toqtatylǵan edi. Kópir astyndaǵy joldy jyl sońyna deıin aıaqtap, paıdalanýǵa beremiz, - dedi Óskemen qalasy ákiminiń orynbasary Abzal Máýlethanov.
Sonymen qatar kópir astyndaǵy jaıaý júrginshilerge arnalǵan demalys aımaǵyn abattandyrý jumystary da qatar júrip jatyr. Qazir munda sporttyq qurylǵylar ornatylýda.
Eske salsaq, osyǵan deıin Oraldaǵy Depo kópiriniń jóndeýden keıin qaıta ashylǵany jaıly jazǵanbyz.