«Ertis» klýbynyń bas bapkeri men 10-ǵa jýyq fýtbolshy komandadan ketti

PAVLODAR. KAZINFORM – Jyl basynan pavlodarlyq «Ertis» fýtbol komandasymen 10-ǵa jýyq oıynshy qosh aıtysqan. Sondaı-aq klýbtyń bas bapkeri men sporttyq dırektory da ornynan ketkeni belgili boldy. 

Fýtbol klýbynan habarlaǵandaı, komandanyń bas bapkeri Rınat Alıýetov qyzmetinen bosady.

– Rınat Alıýetov pen onyń jattyqtyrýshylyq shtaby «Oqjetpes» fýtbol klýby quramynda jumysyn jalǵastyrady. Osy oraıda klýb atynan bas bapker Alıýetov Rınat Muratulyna jáne búkil jattyqtyrýshy shtabyna shyn júrekten alǵys bildiremiz! Birlese otyryp, aldymyzǵa qoıylǵan mindetti oryndap, komandany Premer Lıgaǵa shyǵardyq, - dep habarlady klýbtan.

Sondaı-aq klýb ókilderi fýtbolshylar Vladımır Vomenko, Nurǵaını Býrıbaev, Ádilhan Dobaı, Mohammed Ensebaev, Nuralı Elemes, Vladıslav Vasılev, Erkebulan Tuńǵyshbaev komandadan ketkenin, al Arman Keńesov, Mıram Kıkbaev pen Temirlan Tórebek jalǵa alý merzimi aıaqtalyp, óz klýbtaryna qaıtyp oralǵanyn málim etti. 

Buǵan qosa «Ertistiń» sportyq dırektory Konstantın Gorovenko da qyzmetimen qosh aıtysqan.

Eske sala keteıik, Qazaqstan Premer-lıgasyna joldama alǵan 3 komanda belgili boldy. Olardyń qatarynda «Ertis» komandasy da bar.

Buǵan deıin áleýmettik jelide pavlodarlyq «Ertis» klýby fýtbolshylar men qyzmetkerlerine jalaqy boıynsha qaryz ekeni týraly aqparat ta tarap ketken.