Ertis boıynyń oqyrmandary Almatydaǵy kitaptardy qashyqtan oqı alady
PAVLODAR. KAZINFORM — Pavlodar oqyrmandary úshin Almaty kitaphana júıesindegi kitaptardy onlaın oqý múmkindigi paıda boldy. Buǵan jergilikti kitaphanalarǵa ornatylǵan ózin-ózi basqarý termınaldary múmkindik berip otyr.
Bıyl Ertis-Baıan óńirinde tórt kitaphana jóndeýden ótip, tsıfrlyq júıege kóshti. Sonyń ishinde respýblıkalyq joba aıasynda bıýdjetten tys qarajat esebinen Pavlodar qalasyndaǵy eki kitaphana keshendi túrde jańǵyrtyldy.
Máselen Toraıǵyrov kóshesindegi ortalyq qalalyq kitaphanalar júıesinde 270 myńnan astam kitap bar. Al tsıfrlyq júıede 85 myńy engizilgen. Búginde aǵash sóreleriniń ornyna 2000-nan astam kitap syıatyn 16 qozǵalmaly sóre ornatylǵan.
Pavlodar qalalyq ákimdiginen habarlaǵandaı, kitaphanada ornatylǵan ózin-ózi basqarý termınaly arqyly kitaphanashynyń kómegine júginbeı-aq, Almaty kitaphana júıesindegi kitaptardy da onlaın oqý múmkindigi bar. Buǵan jańa jabdyqtaǵy RFID-tehnologııanyń engizilýi sebep. Osydan birneshe jyl buryn kitaptardy shtrıh-kod arqyly tirkese, budan bylaı atalǵan ádisti qoldaný arqyly oqyrman tańdaǵan kitabyn úı jaǵdaıynda da oqı alady.
— Kitaphanalardyń mazmundyq áleýetin barynsha arttyryp, balalar men jastardy belsendi tartý maqsat etilip otyr. Olar qala turǵyndary úshin tartymdy rýhanı ortalyqqa aınalyp, oqý mádenıeti men bilimge qushtarlyqty qalyptastyratyn mańyzdy keńistik bolýy tıisi, — dep habarlady qalalyq ákimdikten.
Sondaı-aq oblys ortalyǵyndaǵy Múbárak Jamanbalınov atyndaǵy balalar kitaphanasy da jańartýdan ótti. Munda oqý zaly, májilis zaly jáne balalar bólimderi bar. Jańartylǵan ǵımaratta oqýshylardyń yńǵaıyna qaraı qozǵalmaly jıhazdar men sóreler, jumsaq dıvandar ornatylǵan. Sondaı-aq, teatr sabaqtaryna arnalǵan shyny qabyrǵa qurylǵan. Ata-analar balalarynyń daıyndyǵyn óz kózimen kóre alady.
Buǵan deıin jaýapty mınıstrlik kitaphanalardyń tabysyn arttyrýǵa múmkindik baryn aıtqan bolatyn.