Ertis boıynyń balalary Isa Baızaqovtyń muralaryn dáriptedi
PAVLODAR. KAZINFORM — Pavlodardyń Ertis aýdanyndaǵy Qaraqudyq mektebinde Isa Baızaqovtyń esimi ulyqtaldy. Jazǵy demalys kezeńin mazmundy ári qyzyqty ótkizýdi qalaǵan oqýshylar tulǵanyń óleńderin oqyp saıysty.
Balalardyń qyzyǵýshylyǵyn arttyrý maqsatynda jaz mezgilinde túrli tanymdyq jobalar uıymdastyratyn Ertis aýdany bıyl da erekshe kózge túsip otyr.
Búgin Ertistegi Qaraqudyq mektebiniń jazǵy lager bazasynda aýdandyq «Jas aqyndar mektebi» baıqaýy ótkizildi. Uıymdastyrýshylardyń aıtýynsha, is-shara daýylpaz aqyn Isa Baızaqovtyń 125 jyldyq mereıtoıyna arnaldy.
— Arqadan shyǵyp, kúlli qazaq eline tanymal bolǵan daýylpaz aqyn Isa Baızaqov bizdiń aýdanymyzda dúnıege kelgenin jerlesteri árdaıym maqtanysh etedi. Áıgili perzentimizdiń esimin ulyqtaý ári balalardyń jazǵy demalysyn qyzyqty ótkizý maqsatynda búgingi is-sharaǵa myqtap daıyndaldyq. Negizi jazǵy ýaqytta mektepterdiń bazasynda túrli tanymdyq sharalar ótkizý dástúrge aınalǵan. Máselen osydan birneshe jyl buryn jerles aqyn Amanjol Shámkenovtiń muralaryn, byltyr balalar aqyny Múbárak Jamanbalınovtyń shyǵarmalaryn nasıhattadyq. Al bıylǵy tańdaýymyz birden Isa Baızaqovqa tústi. Sebebi elimiz boıynsha tulǵanyń 125 jyldyq mereıtoıy atalyp ótýde. Aqynnyń sońyna qaldyrǵan shyǵarmashylyq mol murasyn, eńbegin jas urpaq bilýi kerek. Ári ony qyzyqty saıystar, túrli baıqaýlar arqyly oqýshylardyń júregine jetkizý bilý kerek boldy, — deıdi Ertis aýdandyq bilim berý bóliminiń ádiskeri Nurgúl Sultanova.
«Jas aqyndar mektebi» baıqaýyna 20-dan astam mektepten oqýshylar jınaldy, onyń ishinde Aqtoǵaı aýdanynan da shákirtter keldi. Olar eń áýeli jas aqyndar baıqaýynda baqtaryn synady. Shyǵarmashylyqqa jaqyn balalar ózderi jazǵan óleńderin usynyp, tyrnaqaldy dúnıelerin oqyp berdi. Odan soń qatysýshylar Isa Baızaqovtyń shyǵarmalarynan ózderi jatqa biletin óleńderin oqydy. Aqyn óleńderin kóbirek jattaǵan ári maqamyn kelistirip oqyǵandar úzdik shyqty. Al sońǵy kezeńde oqýshylar Qazanǵap bı, Baıdaly bı, Shoń bı, Toraıǵyr bı, Baıserke abyz syndy bı-sheshenderdiń birin tańdap, málimetter jınaqtap, salystyryp, slaıd túrinde qorǵady.
5-10-synyp oqýshylary arasynda ótkizilgen is-sharada dástúr jalǵastyǵyn túsindirý, balalardyń sanasynda sóz óneriniń negizgi baǵyttaryn qalyptastyrý, ulttyq mádenıet pen ónerge degen qyzyǵýshylyqtaryn arttyrýǵa mán berildi.
Oqýshylar arasynda tańdaılary taqyldap taqpaq aıtqan ózge ulttyń balalary de erekshe kózge túsip qaldy. Mysal úshin Ertis № 4 mektebiniń 5-synyp oqýshysy Anatolıı Shnaıder Isa Baızaqovtyń 11 óleńin jattap kelipti. Anatolıı shyǵarmashylyqqa talpynyp júrgen bala, aıtýynsha Isa aqynnyń óleńderi oǵan aıryqsha unaıdy.
Baıqaý qorytyndysynda Birlik mektebiniń 8-synyp oqýshysy, Aıanat Serikbaı, Abaı mektebiniń 9-synyp oqýshysy Jaına Maqulbekova, Qaraqudyq mektebiniń oqýshysy Danel Jasqaırat jeńimpaz atandy.
— Halqymyz «Tárbıe — tal besikten» dep taýyp aıtqan. Tárbıeniń negizi otbasynda qalyptasady degenmen, budan keıin mekteptiń de róli zor. Ulttyq tárbıeden, salt-dástúr, aýyz ádebıetinen nár alyp ósken urpaq qaı kezde de atalar amanatyna adal bolaryna kámil senemiz. Ulttyq salt-dástúrdi, mádenıet pen ónerdi nasıhattaý — tárbıeniń tóresi. Sondyqtan mundaı sharalardyń maqsaty — ultjandylyqqa, otansúıgishtikke, tarıhyn, mádenıetin, salt-dástúrin tereń meńgerýge, ana tilin qadirleýge úıretý. Ekinshi turǵydan, balalardyń óz ólkesin keńinen tanı túsýine jol ashady. Óz óńirimizde dúnıege kelgen tarıhı tulǵalardy dáripteý, shyǵarmalaryn nasıhattaý arqyly biz oqýshylardy jigerlendiremiz, olarǵa ulylyq nárin egemiz. Kóptegen ataqty jerlesterimiz týraly málimetter mektep oqýlyqtarynda joq. Máselen, Baıserke abyzdy alaıyq. Onyń eńbegin Ertis-Baıan eli bilgenimen, oqýlyqtarda qamtylmaǵan. Sondyqtan rýhanı muraǵa degen súıispenshilikke tárbıeleý óz jemisin beredi, — deıdi Qazaqstannyń úzdik ólketanýshysy, Ertis aýdanynyń Qurmetti azamaty, til janashyry Samat Mánenov.
Baıqaýdyń ekinshi bólimi qolónerge, ulttyq oıyndarǵa jáne ulttyq taǵamdar ázirleý saıysyna ulasty. Balalardyń ata-analary «Shuqyma keste» qolóner túrin kórsetse, oqýshylar asyq atýdan jáne sadaq atýdan básekege tústi. Sondaı-aq «Vest qurt» — qurt daıyndaý, «Baýrsaq fest» — baýyrsaq pisirý boıynsha sheberlik sabaqtary oıdaǵydaı órildi.
Aýdandyq bilim berý bóliminiń basshysy Maııa Bagıenova barlyq jeńimpaz ben júldegerlerge, belsendi qatysýshylarǵa marapattar tapsyrdy. Sondaı-aq demeýshiler atynan syılyqtar berildi.
Nurgúl Sultanovanyń aıtýynsha, dúldúl aqyn Isa Baızaqovtyń 125 jyldyq mereıtoıyna oraı bıyl jyl basynan aýdandyq bilim berý bóliminiń muryndyq bolýymen kóptegen is-shara uıymdastyrylǵan. Bul tarapta «Ertis Isany oqıdy» atty chellendjdi, aqyn týǵan aýyl — Úlgilidegi murajaıǵa jasalǵan ekskýrsııany, aýdandyq «Ádebı keıipkerlerdiń sherýi» baıqaýyn, «Ómiri óshpes ónege» taqyrybyndaǵy aýdandyq sýret jáne qolóner baıqaýyn jáne t. b. atap ótýge bolady. Munda 2011 jyldan bastap Isa oqýlary úzbeı ótkizilip keledi.
Aıtyp óteıik, búginde Ertis aýdanynda 25 mektep, 2571 oqýshy bar.
Eske sala keteıik, Pavlodarda bıyl 109 myńnan astam oqýshy jazǵy demalysyn tıimdi ótkize alady.