Ertis boıynda 110 myńnan astam oqýshy jazǵy demalyspen qamtylady

Óńirlik bilim berý basqarmasynan atap ótkendeı, balalar demalysynyń ınfraqurylymy edáýir keńeıtilip, mektep janyndaǵy lagerlerdiń sany 334-ten 356-ǵa, beıindik lagerler 357-den 576-ǵa deıin kóbeıgeli otyr. Áleýmettik osal sanattaǵy balalardy qoldaýǵa da erekshe kóńil bólinedi. Aldaǵy jazda 35 389 bala demalys jáne saýyqtyrý is-sharalarymen qamtylsa (bul qajettiliktiń 100 paıyzy), jalpyǵa birdeı bilim berý qory esebinen 10 829 bala joldamamen qamtamasyz etiledi. Bul maqsatqa 268,8 mln teńge bólingen.

— Jazǵy demalys kezeńin uıymdastyrýǵa oblystyq bıýdjetten jalpy somasy 669 mln teńge qarajat qarastyrylǵan. Demalysty qaýipsiz ári sapaly túrde uıymdastyrý maqsatynda oblys aýmaǵy boıynsha qala syrtyndaǵy 11 lagerdiń jumysy josparlanýda. Onyń ishinde jyl boıy qyzmet kórsetetin «Jas dáýren» (Baıanaýyl aýdany) men «Baldáýren» (Mıchýrın aýyly) lagerleri jazǵy kezeńde 1800 balany qabyldaı alady. Maýsymdyq lagerlerde 3538 balanyń demalysy uıymdastyrylady. Jalpy lagerlerdiń jumys kezeni 1 maýsymnan 27 tamyzǵa deıin jalǵasady, — dep atap ótti óńirlik bilim berý basqarmasy basshysynyń orynbasary Alma Aıtýarova.

Budan bólek, 38 myńnan astam balany qamtıtyn 356 mektep janyndaǵy lagerler men 61 myńnan astam oqýshyny qabyldaıtyn 576 beıindik lager ashylady. Belsendi demalysty unatatyndar úshin 41 shatyrly jáne kıiz úı lager uıymdastyrylady. 

Lagerlerde IT salasyn nasıhattaýǵa, jasandy ıntellekti quraldaryn engizýge basymdyq beriledi. Aqparattyq tehnologııalar kolledjiniń IT-hub bazasynda maýsym aıynda 5-9 synyp oqýshylaryna arnalǵan jasandy ıntellekti men baǵdarlamalaý negizderin úıretetin «Prompt AI Lab» jazǵy mektebi uıymdastyrylady. Sondaı-aq mektep janyndaǵy lagerlerde «Bolashaq IT lager: jasandy ıntellekti jáne tsıfrlyq baǵdarlamalyq resýrstar» atty 12 kúndik hakaton ótedi. 

Buǵan deıin Shymkentte balalar demalysyna qala bıýdjetinen 755 mln teńgeden astam qarjy bólingeni týraly jazǵan bolatynbyz.