Ertis boıynda 10 til biletin oqýshy turady
PAVLODAR. KAZINFORM — Ásel Abdýrahımova nebári jeti jasynan álemniń barlyq astanalaryn biletin. Al toǵyzǵa tolǵanda frantsýz tilin ózdiginen úırene bastaǵan.
Pavlodar qalasyndaǵy daryndy balalarǵa arnalǵan № 8 mektep-lıtseıiniń oqýshysy Ásel Abdýrahımova elimizdegi jas polıglottar arasynda aıryqsha tanylǵan talantty qyz.
Ol búginde álemniń 10 tilin biledi ári onyń basym bóligin óz betinshe meńgergen.
Shetel tilderine degen qyzyǵýshylyq bala kezinen bastalypty. Jeti jasynda-aq ol álem elderiniń barlyq astanalaryn biletin ári túrli mádenıet ókilderimen sóılesýdi armandaıtyn.
— Toǵyz jasymda frantsýz tilin ózdigimnen úırene bastadym. Al on birge tolǵanda Pavlodar qalasyndaǵy alǵashqy kýrsqa bardym. Aǵylshyn tilin 2018 jyldan beri oqyp kelemin. Bul til qazirgi ýaqytta kúndelikti ómirimniń ajyramas bóligine aınalǵan. Qytaı tilin kýrstarda oqyp meńgerdim. Qazir ony jalǵastyryp, halyqaralyq HSK 3 deńgeıi (B1) emtıhanyn tapsyrýǵa daıyndalyp júrmin, — deıdi Ásel.
Memlekettik til men óz ana tili — tájik tilinen bólek ózge tilderdi, atap aıtqanda ózbek, orys, ıspan, ıtalııa jáne japon (N4) tilderin álem mádenıetterine degen qyzyǵýshylyǵy men túrli halyqtardy túsinýge degen umtylysynyń arqasynda tolyqtaı óz betinshe meńgergen. Ol bul tilderdiń barlyǵynda erkin sóıleıtin dárejege jetip otyr.
— Men árdaıym saıahat jasap, túrli elderdiń adamdarymen erkin sóılesýdi armandaıtynmyn. Tilder — men úshin mádenıetterge, adamdarǵa jáne múmkindikterge ashylatyn kilt. Kelesi maqsatym — arab tilin úırenip, BUU-nyń alty resmı tilin tolyq meńgerý. Bul meni alǵa umtyldyratyn jáne jańa kókjıekterdi ashýǵa shabyttandyratyn arman, — deıdi ol.
Ásel búginde 11-synypta oqyp júr. Mektep ákimshiligi polıglot qyz oqýshylar arasynda eńbekqorlyǵymen jáne tárbıesimen ózgelerge úlgi ekenin atap ótti. Onyń jetistikteri qurby-qurdastaryn yntalandyryp, bilimge degen talpynys pen tabandylyq orasan nátıjelerge jetkizetinin dáleldep otyr.
Eske sala keteıik, pavlodarlyq oqýshy sý aıdyndarynyń sapasyn tekseretin dron qurastyrdy.