Ertis-Baıan óńiriniń bes myńnan astam túlegi «Aq bantık» ánin shyrqady
PAVLODAR. KAZINFORM — Pavlodar oblysynyń 5 myńnan astam mektep túlegi bıylǵy qoshtasý keshterin erekshe atap ótip, júrekterge jyly áser syılaǵan taǵylymdy bastamaǵa ún qosty.
Jas túlekter qazaq rýhanııatynyń kórnekti ókili Muhtar Shahanovtyń sózine, sazger Shámshi Qaldaıaqovtyń áýenine jazylǵan áıgili «Aq bantık» ánin bir mezette qosylyp oryndap, áserli rýhanı atmosfera qalyptastyrdy.
Myńdaǵan jastyń bir ýaqytta áýelete shyrqaǵan áni mekteppen qoshtasqan qımas sátterdiń, balalyq shaqtaǵy tátti estelikterdiń, ustazǵa degen shynaıy alǵystyń jáne bolashaqqa degen senimniń sımvolyna aınaldy. Bul bastama qazaq óneri men rýhanııatyna degen qurmettiń jarqyn kórinisin kórsetti.
— Bul chellendjge qatysý men úshin óte jarqyn ári este qalarlyq oqıǵa boldy. Ásirese dál Ekibastuz túlekteriniń oblys boıynsha osyndaı aýqymdy jobany alǵash bolyp bastaǵanyn seziný erekshe qýanysh syılady. 500-den astam oqýshynyń bir mezette qosylyp án oryndaýy sol sátte shynaıy birlikti, qoldaýdy jáne erekshe rýhanı atmosferany sezindirdi. «Aq bantık» áni mektep jyldaryn, dostyqty, súıikti ustazdardy jáne ýaqyttyń qalaı tez ótkenin qaıta eske saldy. Osyndaı sátter ár túlektiń júreginde ómir boıy saqtalatynyna senemin, — deıdi Ekibastuz qalasy № 5 jalpy orta bilim berý mektebiniń 11 «B» synyp oqýshysy Ilıa Galýtva.
Al ekibastuzdyq taǵy bir túlek Merýert Kókkózova mektep bitirgen kezde dál osy «Aq bantık» ánin úlken sahnada oryndasam dep armandaǵanyn jetkizdi.
— Sol armanymnyń oryndalýy men úshin úlken qýanysh boldy. Ásirese Ekibastuzdyń júzdegen túlekterimen birge bir ándi qosylyp aıtqan sát áli kúnge deıin kóz aldymda. Bir sátte bárimizdiń kóńilimiz tolqyp, mekteppen qoshtasyp jatqanymyz anyq sezildi. Bul án maǵan balalyq shaǵymdy, synyptastarymdy, qońyraý únin, mekteptegi eń baqytty kúnderdi eske túsirdi. Osyndaı áserli chellendjdiń bir bóligi bolǵanyma óte qýanyshtymyn, — dep erekshe tolǵanysyn jetkizdi jas túlek.
Óńir boıynsha erekshe chellendjdi Ekibastuz qalasyndaǵy Estaı atyndaǵy mýzykalyq mektep alǵashqy bolyp uıymdastyrǵan edi. Bilim uıasynyń dırektory Ásemgúl Dokýlovanyń aıtýynsha, ul-qyzdar «Aq bantıktiń» sózderin birden jattap alyp, daıyndyqqa yntalana kirisken. Muhtar Shahanovtyń rýhty, áserli jyrlaryn barlyǵy biledi. Al onyń sózine jazylǵan mundaı aıaýly, saǵynyshty ándi aǵa býyn jattap óskeni anyq. Chellendj bul turǵydan alǵanda aqynnyń rýhyna taǵzym etýdiń bir úlgisine aınalǵan.
— Qulaqqa jaǵymdy, sazdy ándi oryndaýdyń ózi túlekterge erekshe lázzat syılady dep oılaımyn. Qala boıynsha 21 mektepten jalpy sany 500 oqýshy jınaldy. Túlekter án salyp turǵanda «Serpantın» horeografııalyq ansambliniń músheleri vals bılep, erekshe úılesim tapty. Jalpy Ekibastuz qalasy boıynsha búginde 11-synyptardy 1109 bala aıaqtaǵaly otyr, — dep atap ótti mýzyka mektebiniń basshysy.
Estaı atyndaǵy mýzykalyq mektepte búginde 730 bala ónerdiń san salasyn úırenip jatyr. Munda 15 túrli mýzykalyq baǵyt úıretiledi. Bıylǵy oqý jyly tabysty órilip, shákirtteri oblystyq, respýblıkalyq óner dodalarynan júldeli oralypty. Sonyń biri — tórt jylda bir ret uıymdastyrylatyn «Jas mýzykant» respýblıkalyq baıqaýynda mektep hory birinshi oryndy jeńip alǵan. Almaty, Shymkent sııaqty iri shaharlardyń óner ujymdaryn jolda qaldyrǵan jas ónerpazdardyń ónerin qazylar alqasy joǵary baǵalapty.
Chellendjge belsene qatysqan mektepter arasynda Pavlodar qalasyndaǵy Baýyrjan Momyshuly atyndaǵy bilim shańyraǵy bar. Bul mektepte búginde 1511 oqýshy bilim alyp jatyr. Mektep dırektorynyń orynbasary Amangeldi Baltabaıulynyń sózinshe, túlekter úshin chellendj erekshe sátterge toly ótken.
Aıta ketý kerek, bul áserli is-shara Pavlodar oblysy turǵyndarynyń usynysy negizinde júzege asyrylǵan. Igi bastamany óńirdiń barlyq qala men aýdandardyń bilim berý bólimderi qoldap, uıymdastyrdy. Bir ánge birigip, bir sezimdi bólisken myńdaǵan túlek sol sátte mekteppen ǵana qoshtasqan joq. Olar ulttyq óner men rýhanııatqa degen tereń qurmettiń, urpaqtar sabaqtastyǵynyń jáne týǵan elge degen shynaıy súıispenshiliktiń aıqyn úlgisin kórsetti.
«Aq bantık» — qazaq mýzyka ónerindegi eń názik ári ómirsheń týyndylardyń biri. Bul án jaıdan-jaı týa salǵan shyǵarma emes, naqty ómirlik oqıǵaǵa baılanysty jaryqqa shyqqan. 1966 jyly Shámshi Qaldaıaqov pen Muhtar Shahanovtyń jaqyn dosy Qarajan Ábilázimov shańyraq kóteredi. Onyń jary mektepti jańa ǵana bitirgen, shashyna aq bantık taqqan jas qyz Patıma Tórehanova edi. Toıǵa daıyndyq kezinde Shámshi men Muhtar dostaryna erekshe tartý jasaýdy oılaıdy. Ádettegi syılyqtyń ornyna ekeýi án arnaýdy jón kóredi. Jastardyń qýanyshyna arnalyp týǵan án birden jurttyń kóńilinen shyǵyp, toı ústinde-aq kópshilik qosylyp aıtyp ketedi. Sol kezeńdegi estelikterge qaraǵanda, ándi toıǵa kelgender birden jattap alyp, keıin el arasyna tarata bastaǵan.
Buǵan deıin Qazaqstanda mektep túlekteri sońǵy qońyraýǵa qansha teńge jumsaıtynyn jazǵanbyz.
