Bir óńir, ártúrli baǵa: Pavlodar oblysynda aýyzsýdyń baǵasy qansha
PAVLODAR. KAZINFORM — Pavlodar oblysynda aýyl turǵyndary úshin aýyzsý tarıfi eldi mekenge qaraı aıtarlyqtaı erekshelenedi. Máselen, Ýspen aýdanyndaǵy Galıtskoe aýylynda sýdyń tekshe metri 46,23 teńge tursa, Baıanaýyl aýdanynda bul tarıf 280 teńgege jetedi.
Óńirlik energetıka jáne turǵyn úı-kommýnaldyq sharýashylyq basqarmasynyń málimetinshe, óńirdegi halqy 100 paıyz taza aýyz sýmen qamtamasyz etilgen. Degenmen eldi mekenderdi tirshilik nárimen qamtamasyz etý tásili ártúrli. Birqatar eldi meken ortalyqtandyrylǵan sý qubyryna qosylsa, endi birinde keshendi blok-modýlder men sý taratý baǵanalary ornatylǵan.
Ortasha tarıf — 165,6 teńge
Oblysta halyq úshin aýyzsýdyń ortasha tarıfi tekshe metrine — 165,6 teńge. Bul kórsetkish qosylǵan qun salyǵyn esepke almaǵanda belgilengen. Eń tómengi tarıf Ýspen aýdanynyń Galıtskoe aýylynda tirkelgen. Munda aýyzsýdyń bir tekshe metri 46,23 teńge turady. Al eń joǵary tarıf Baıanaýyl aýdanynda — 280 teńge.
Bıyl tarıfterge qatysty ózgerister de engizilgen. Atap aıtqanda, Pavlodar jáne Aqqýly aýdandarynda jańa tarıfter bekitildi. Pavlodar aýdanynda aýyzsýdyń tekshe metri 83,63 teńge, al Aqqýly aýdanynda 95,39 teńge bolyp belgilengen. Kórsetilgen baǵalarǵa qosylǵan qun salyǵy kirmeıdi.
Ortalyq jelini 200 myń adam paıdalanady
Energetıka jáne turǵyn úı-kommýnaldyq sharýashylyq basqarmasynyń deregine súıensek, oblystaǵy 345 aýyldyq eldi mekenniń 239-y ortalyqtandyrylǵan sýmen jabdyqtaý júıesine qol jetkizgen. Bul júıeni shamamen 200 myń adam paıdalanady.
Taǵy 97 aýylda keshendi blok-modýlder ornatylǵan. Al 9 eldi mekenniń turǵyndary toptyq sý qubyrlarynan tartylǵan sý taratý baǵanalaryn paıdalanady. Bul nysandar arqyly 11,9 myń adam aýyzsýǵa qol jetkizip otyr.
Osylaısha, aýyldyq jerlerde sýmen jabdyqtaýdyń birneshe túri qatar qoldanylyp keledi. Ortalyqtandyrylǵan júıe turǵyndarǵa sýdy tikeleı úıine jetkizýge múmkindik berse, blok-modýlder men sý taratý baǵanalary ózge eldi mekenderdiń qajetin óteýge baǵyttalǵan.
Normadan aýytqý tirkelgen
Aýyzsýmen qamtýda sýdyń qoljetimdi bolýymen qatar, onyń sanıtarııalyq talaptarǵa sáıkestigi de mańyzdy. Buǵan deıingi derekter boıynsha, byltyr oblystaǵy ortalyqtandyrylǵan jáne oqshaýlanǵan aýyzsý kózderinen 1 559 synama alynǵan. Onyń 62-sinen mıkrobıologııalyq jáne sanıtarııalyq-hımııalyq kórsetkishter boıynsha normadan aýytqý anyqtalǵan.
Osyǵan baılanysty sanıtarııalyq-epıdemıologııalyq baqylaý mamandary aýdan-qala ákimdikteri men sýmen jabdyqtaý uıymdaryna sý qubyrlaryn júıeli túrde shaıyp, súzgilerdi ýaqytyly aýystyrý qajet ekenin eskertken.
Sý sapasyna turaqty baqylaý júrgizý turǵyndardyń densaýlyǵyn qorǵaý jáne aýyzsýmen jabdyqtaý júıeleriniń qaýipsizdigin qamtamasyz etý úshin qajet.
Aýyldardy sýmen qamtý jumystary jalǵasady
Oblys ákimdiginiń málimetinshe, óńirdiń aýyldyq jerlerinde ınfraqurylymdy damytýǵa baǵyttalǵan ınvestıtsııalyq jobalar júzege asyrylyp jatyr. Negizgi basymdyqtardyń biri — aýyzsýmen jabdyqtaý nysandaryn salý jáne jańǵyrtý.
Aýyldarǵa sý qubyrlaryn tartý ortalyqtandyrylǵan júıeniń qamtý aıasyn keńeıtýge múmkindik beredi. Sonymen birge sý tarıfiniń qoljetimdi bolýy, sapanyń sanıtarııalyq talaptarǵa saı kelýi jáne qoldanystaǵy ınfraqurylymnyń turaqty jumys isteýi de nazarda bolýy kerek.
Osylaısha, Pavlodar oblysynda aýyzsýǵa qoljetimdilik tolyq qamtamasyz etilgeni aıtylǵanymen, eldi mekenderdegi sýmen jabdyqtaý tásilderi men tarıfteriniń aıyrmashylyǵy bul salany odan ári damytý qajet ekenin kórsetedi.
Eske salaıyq, BQO-da aýyzsýdyń sapasyn baqylaý barysynda 80 synama talapqa saı kelmedi.
