Syqyrlaǵan aıazda janymyzǵa jylý bergen qazaqtardyń arqasynda jan saqtadyq — Mıkaıl Aýshev
PAVLODAR. KAZINFORM — El birliginiń irgetasyn nyǵaıtýǵa atsalysý belgili bir mamandyqty qajet etpeıtini málim. Ertis-Baıan óńirinde kásipkerligimen aty shyqqan Mıkaıl Aýshev halyq dostyǵyna tamshydaı bolsa da úlesimdi qossam deıtin azamattyń biri.
Mıkaıl Aýshevtiń ata-anasy deportatsııa jyldary ózge ulttarmen Qap taýynan Qazaqstanǵa aýyp kelgen. Qazaq halqynyń qonaqjaılyǵy men qamqorlyǵynyń arqasynda Arqa jeriniń ystyq-sýyǵyna tózip, kúrdeli kezeńdi bastan ótkerdi. Mıhaıldiń ákesi 12 jasynda, anasy odan da kishi jetkinshek shaǵynda Ertis-Baıan óńiriniń qasıetti topyraǵyna taban tiregen. Stalınnyń pármenimen ókpeden ótken yzǵarda sýyq vagondarda qoısha aıdalǵan baýyrlas halyq alda ne taǵdyr kútip turǵanyn bilmegeni anyq.
— Kúshpen kóshirý taqyryby bizdiń bala shaǵymyzda aıtylmaıtyn. Tek eseıip, ómirge aralasa bastaǵan shaqta ata-anamyz tam-tumdap aıta bastady. «Jaratqan bizdi musylman elge tap keltirmegende taǵdyr-talaıymyzdyń qalaı bolaryn kim bilgen… Saqyrlaǵan aıazda janymyzǵa jylý bergen qazaqtardyń arqasynda jan saqtadyq», deıtin marqum áke-sheshem. Ákem 91-ge, anam 85-ke kelip ómirden ozdy. Olardyń qazaq halqyna degen yqylas-qurmeti erekshetuǵyn. Bir tilim nan tabý — baqyt bolǵan zamannyń teperishin kórmesek te, úlkenderdiń aıtýymen sezindik. Qonaqjaılyq — qazaqtyń qanyna bitken qasıet qana emes, ol — jergilikti halyqtyń ulttyq kolorıti dep oılaımyn. Bir mezette sheshen, ıngýsh, nemis, káris, t. b. sandaǵan ulttarǵa pana bolý qazaq halqynyń ǵana qolynan kelgen, -dep bastady áńgimesin Mıkaıl Osmanuly.
Ol búginde Pavlodar oblystyq »Halkan bart» («Halyq birligi») sheshen-ıngýsh etnomádenı birlestiginiń tóraǵasy bolyp qyzmet atqarady. Munda atalǵan ult ókilderiniń mádenıeti men ana tilin, salt-dástúrin, ádet-ǵurpyn jańǵyrtý, Qazaqstan halqynyń tarıhy men memlekettik tildi, mádenıeti men qundylyqtaryn úıretý maqsat etiledi. Aqsaqaldar keńesi, Analar keńesi, jastar birlestigi, sport úıirmeleri, vokaldyq jáne bı ujymdary bar. Ekibastuz ben Aqsý qalalarynda, Aqtoǵaı, Pavlodar, Sharbaqty, Tereńkól aýdandarynda fılıaldary jumys istep tur.
2024 jylǵy sý tasqyny kezeńinde atalǵan ortalyq atynan zardap shegýshilerge aıtarlyqtaı materıaldyq jáne aqshalaı kómek kórsetildi. Deıturǵanmen Mıhaıl Osmanuly muqtajdarǵa birlestiktiń jáne óz otbasy atynan bergen kómekti sanamalap aıtýǵa yńǵaısyzdanatynyn jetkizdi. «Bastysy, jasap jatqan kómegim Jaratqanǵa aıan», deıdi. Bir jyldary elimizdiń ońtústigindegi áskerı qoımada jarylys bolǵanda onyń sharýashylyǵy 25 tonna kartop jóneltkenin bilemiz.
M.Aýshevtiń Assambleıadaǵy qyzmetinen bólek, jurt ony iri sharýashylyq basshysy retinde jaqsy tanıdy. Jelezın aýdanyndaǵy «Pahar» ShQ» JShS-in uzaq jyldardan beri basqaryp, tyń jerden agroqalashyq turǵyzdy. Shańy shyǵyp jatqan qý taqyr jerde qurylysy 2011 jyly bastalǵan agroqalashyq arada bes jyl ótkende jalpy sany 300-ge jýyq adamdy jumyspen qamtıtyn irgeli sharýashylyqqa aınaldy. Búginde munda sharýashylyq ǵımarattaryna qosa, turǵyn úıler salynǵan. Jalpy sany 48 páter bar. Baspanalar ortalyqtandyrylǵan jylý, sý, káriz júıelerine qosylǵan. Jaıly páterlerdi panalaǵan otbasylar páter aqysy men kommýnaldyq tólemderden bosatylǵan. Bastysy sharýashylyqtyń jumysyna adaldyq tanytyp, ortaq múlikke uqypty bolsa jetip jatyr. Sharýashylyqta 9,2 myń gektarǵa egin salynyp, asyl tuqymdy mal ustalady. Zamanǵa saı turǵyzylǵan taýarly sút fermasynda myńdaǵan sıyr bar. Maldyń jem-shóbine arnalǵan arnaıy baza, kókónis qoımalary, mashına-traktor parki jáne t. b. aýqymdylyǵymen kórgen jandy tamsantady.
«Pahar» ShQ» sýarmaly eginshilik boıynsha elimizdi qoıyp, TMD boıynsha eń iri sharýashylyqtardyń biri bolyp sanalady. 9,2 myń gektardyń shamamen 60 paıyzy qoldan jasalǵan sý jınaǵyshtan aǵyp shyǵatyn kanaldan sýarylady. Bul kanaldyń jalpy uzyndyǵy 92 shaqyrym.
— Biz qonys etken jerdiń topyraǵy negizinen qumdy. Bıdaı, arpa, suly sııaqty dándi daqyldarǵa asa qolaıly emes, biraq kartop pen júgeri jaqsy ósedi. Qoldan sýarýdyń arqasynda ónimdilikti joǵary deńgeıde ustaýǵa múmkindigimiz bar. Al kartobymyz sapaly ári uzaq saqtalady. Oblystyq turaqtandyrý qoryna jyl saıyn kartop beremiz. Bıylǵy qysqa kılogramyn 100 teńgeden 680 tonna ónim tapsyrdyq. Bul jerdegi negizgi másele ál-aýqaty tómen otbasylardy baǵasy arzan azyq túrimen qamtamasyz etý bolǵandyqtan, úılestirý organdary qansha ónim surasa da berýge daıynbyz. Sebebi jergilikti astyqtyń yryzdyǵyn eń áýeli ózimizdiń turǵyndar kórip, sezinýi kerek. Memleket, halyq aldynda belgili bir mindettemelerimiz bar ekenin árdaıym umytpaımyz, — deıdi ol.
Sóz sońynda Mıkaıl Osmanuly jas urpaqqa otanshyldyq rýhynyń dánin egý baǵytyndaǵy jumystardy jalǵastyra beretinin aıtyp ótti.
— Balalaryma únemi Qazaqstannyń patrıoty bolyńdar, qajet bolsa Otanymyzdy qorǵaýǵa daıyn turyńdar dep aıtyp otyramyn. Sebebi bizdiń Otanymyz bireý, ol — Qazaq eli! Qasıetti qazaq jeriniń topyraǵyn mekendep, kásip etip, nan taýyp otyrǵan ár sanaly azamat osylaı oılaıtynyna daýym joq, — dep túıindedi sózin.
Eske sala keteıik, Ata Zańymyzda birlik pen kelisimniń negizderi nyǵaıa túsedi.