Ertis-Baıan óńirinde taǵy 42 aýyldyq mektep Starlink júıesine qosylady

PAVLODAR. KAZINFORM — Qazirgi ýaqytta Starlink júıesi 33 aýyldyq mektep úshin qoljetimdi. Al oblys boıynsha 10 aýyl baılanyssyz, 7 aýyl ınternetsiz qalyp otyr.

Oblys ákimi baspasóz qyzmetiniń deregine súıensek, óńirdiń 352 aýyldyq eldi mekeninen 342 aýyl (97,1%) uıaly baılanyspen, al 343 aýyl (97,4%) mobıldi jáne tirkelgen ınternetpen qamtamasyz etilgen. Bul rette 10 aýyl baılanyssyz jáne 7 aýyl ınternetsiz qalyp otyr. Sońǵylary — tehnıkalyq iske asyrý qosymsha sheshimderdi talap etetin shaǵyn, shalǵaıda jatqan eldi mekender.

— Aýyl mektepterine ınternet qosý jumystaryna erekshe kóńil bólinip otyr. 2024 jyly 33 mektep Starlink júıesi arqyly ınternetpen jabdyqtaldy. Taǵy 42 mektep jańa oqý jylynyń basynda qosylady. Barlyq mektepterdi 1 qyrkúıekke deıin qosý josparlanǵan, -dep habarlady baspasóz qyzmetinen.

Buǵan qosa «Qoljetimdi ınternet» ulttyq jobasy aıasynda talshyqty-optıkalyq baılanys jelileriniń belsendi qurylysy júrgizilip jatyr. 2027 jylǵa deıin oblystyń 207 aýylyn qamtý josparlanǵan. Shalǵaıdaǵy az qonystanǵan eldi mekenderde KazSat, OneWeb jáne Starlink spýtnıktik tehnologııalar bazasynda balamaly sheshimder engizilip jatyr.

Buǵan deıin Aqsýdaǵy jalǵan qurylys pen qaǵaz júzindegi ınternet úshin 560 mln teńge jumsalǵany týraly jazǵanbyz.