Ertis-Baıan óńirinde Maıra men Jaıaý Musanyń mereıtoılary bastalyp ketti
PAVLODAR. KAZINFORM - Ertis-Baıan óńirinde el esinde qalarlyq erekshe kontsert ótti. Jergilikti kompozıtorlardyń shyǵarmalary oryndalǵan keshte buryn úlken sahnaǵa aıaq baspaǵan alys aýdandardyń ónerpazdary jarq etip kórindi.
Kórermenderdiń zor yqylasyna ıe bolǵan «Altyn besik – týǵan el!» kontserti osymen óńirimizde ekinshi ret ótkizilip otyr. Isa Baızaqov atyndaǵy oblystyq fılarmonııa uıytqy bolǵan rýhanı is-sharada birqatar ánder orkestrdiń súıemeldeýimen oryndalyp, ansamblder men jeke oryndaýshylar kóńil hoshyn ashatyn shyǵarmalarmen qulaq quryshyn qandyrdy.
Joba avtory, Rústembek Omarov atyndaǵy qazaq ult aspaptar orkestriniń kórkemdik jetekshisi Talǵat Kárimov Arqa dalasyndaǵy án oryndaýshylyq óneri osyndaı kontsertter arqyly jalǵasyp, jańǵyryp otyratynyn aıtady.
- Keshegi Jarylǵapberdi, Jaıaý Musa, Isa, Estaı, Maıra, Imanjúsip sııaqty halyq kompozıtorlary án-jyrǵa bólegen Ertis-Baıan óńirinde búginde ulttyq kolorıtimiz – dástúrli ánshilik óz deńgeıinde saqtalyp otyr. Qanshama jastarymyz el jadynan óship bara jatqan kóne shyǵarmalardy qaıta jańǵyrtty. Endi biri zamanǵa saı laıyqtap, keıbir ánderge ekinshi ómir syılady. «Altyn besik – týǵan el!» jobasynyń maqsaty – eldegi altyndarymyzdy úlken sahnaǵa jeteleý, jergilikti kompozıtorlardyń ánderin nasıhattaý. Baıanaýyldaǵy «Beý, jigitter» halyq ansambliniń oryndaýynda uzaq jyldar oryndalyp kele jatqan Aman Baıazıtovtyń «Baıanym», marqum kompozıtor Qaıyrbek Sátıevtiń «Aqmara» ánderi búgin orkestrmen oryndalyp, jurt jyly qabyldaǵanyn kózimiz shaldy. Biz úshin bıyl jas kúıshi Uǵybaıdolla Múftánniń «Alash amanaty», belgili kúıshi, QR Mádenıet salasynyń úzdigi Serik Syzdyqovtyń «Terisqaqpa tolǵaýy», «Turar Aqjeleń» kúıleri erekshe jańalyq bolyp otyr. U.Múftánnyń atalǵan týyndysyn bizdiń orkestr byltyrǵy Dombyra kúninde Ertis jaǵalaýynda ornalasqan «Ertis Promenade» sahnasynda oryndap, kórermender zor qoshemetpen qabyldaǵan edi,-deıdi QR eńbek sińirgen mádenıet qaıratkeri Talǵat Kárimov.
Bıyl «Beý, jigitter» ansambliniń qurylǵanyna 40 jyl tolyp otyr. Halyq ansambliniń músheleri osy jyldar ishinde úsh márte aýysqan. 1986 jyly Baıanaýyl aýdanyndaǵy mádenıet úıiniń janynan úgit-nasıhat brıgadasy retinde qurylǵan óner ujymynyń alǵashqy jetekshisi - Júrsinbaı Muqaev edi. Kileń jigitterden quralǵan ansambl 1991 jyly Qabardın – Balkar elinde ótken dúnıejúzilik túrkitildes elder festıvalinde jáne 1993 jyly Daǵystanda ótken «Radıga» festıvalinde óner kórsetip, laýreat atanady. Odan beri de kóptegen respýblıkalyq jáne halyqaralyq kontsertter men keshterge qatysyp, Arqa dalasynyń ónerin pash etti. Jýyqta Almaty qalasynda ótken respýblıkalyq «Samǵaý» baıqaýynda dástúrli án nomınatsııasy boıynsha júldeli orynǵa ıe boldy.
- Tuńǵysh ret orkestrdiń súıemeldeýimen úlken sahnada án oryndadyq. Isa Baızaqov atyndaǵy oblystyq fılarmonııa ujymyna bizge osyndaı múmkindik syılaǵanyna rızamyz. Bıyl jeltoqsan aıynda ansamblimizdiń qurylǵanyna 40 jyl tolǵaly otyr. Soǵan oraı birneshe ándi repertýarymyzǵa qospaq oıymyz bar. Mysaly sózin áıgili Muzafar Álimbaev jazǵan «Maraldym» ánin, Nurǵısa Tilendıevtiń «Baıanaýyl valsin» ózgeshe mánerde, jańasha yrǵaqta jazyp jatyrmyz. Jyl sońynda Pavlodar jáne Qaraǵandy oblystarynyń aýdan-qalalaryn aralap, kontsert berý oıymyzda tur, - dep josparlarymen bólisti «Beý, jigitterdiń» oryndaýshysy Jandos Adamov.
Talǵat Kárimov atap ótkendeı, dástúrge aınalyp kele jatqan bıylǵy kontsert Jaıaý Musanyń 190, Abaıdyń 180, Maıranyń 135, sondaı-aq, Isa Baızaqovtyń 125 jyldyǵyna arnaldy. Aldaǵy ýaqytta jergilikti avtorlardyń án-jyry taspaǵa túsirilip, saz jınaǵyn shyǵarý oıda bar. Al odan soń mundaı rýhanı keshterdi ózge aýdan-qalalarda uıymdastyrý kózdelip otyr.
Kontserttik keshte jergilikti kompozıtorlardyń 20-dan astam án-kúıi oryndaldy. Keshte R.Omarov atyndaǵy qazaq ult aspaptar orkestrinen bólek, «Shernııaz» bı ansambli, kameralyq hor, «SAMIYAN» vokaldyq toby, «Retro» vokaldyq ansambli, fılarmonııanyń jeke oryndaýshylary, ánshiler Erbolat Bortybaı, Arman Raı, Altyngúl Baqythan, Esim Beıbithan, «RUH» etno-mıks ansambli, Dáýrenbek Slámǵalı, Shyńǵys Asyǵatuly jáne taǵy basqalary óner kórsetti.
Buǵan deıin «Qytaı óneriniń altyn táji» atanǵan qazaq áni týraly jazǵanbyz.
